Úkimet «Ǵylym týraly» zań jobasyn maquldady
ASTANA. Aqpannyń 23-i. QazAqparat /Ernur Aqanbaı/ - Búgin Qazaqstan Úkimeti «Qazaqstan Respýblıkasynyń ǵylym týraly» zań jobasyn maquldady. Búgin Úkimet otyrysynda Mınıstrler kabınetiniń músheleri atalmysh zań jobasyna biraýyzdan daýys berdi. Endi zań jobasy Parlamentke engiziletin bolady,
dep habarlaıdy QazAqparat.
Zań jobasy maquldanǵannan keıin Premer-Mınıstr Kárim Másimov Bilim jáne ǵylym mınıstri Janseıit Túımebaevqa ony parlamentshiler aldynda jaqsylap tanystyrýdy tapsyrdy. «Depýtattarǵa, ǵylymı qoǵamdastyqqa, tutastaı qoǵamǵa atalmysh zań jobasynyń qajettiligin túsindirý kerek. Bizge birinshi kezekte álemdik qoǵamdastyq moıyndaıtyn ǵylym, naqty ǵylymı nátıjeler kerek», dedi Premer-Mınıstr.
J. Túımebaevtyń aıtýynsha, «Ǵylym týraly» zań jobasy Memleket basshysynyń tapsyrmasyna sáıkes ázirlengen. Zań jobasynyń negizgi maqsaty - transfert, el damýynyń basym baǵyttary boıynsha jańa bilimdi qurý arqyly Qazaqstan ekonomıkasyn básekege qabilettiligin atqarýǵa múmkindik týǵyzatyn ulttyq ınnovatsııalyq júıeni qurý. Zań jobasy ǵylymdy basqarýdyń negizgi tujyrymdamalyq erejelerin bekitedi. «Zań jobasy ǵylymdy basqarý jáne qarjylandyrý júıesin jetildirýge, ǵalym men ǵylymnyń rólin kúsheıtýge, ǵylymı zertteýlerdiń nátıjelerin kommertsııalaýdy ilgeriletýge, ǵylymı zertteýlerdiń sapasy men nátıjesin arttyrýǵa, sondaı-aq ǵylymı qyzmetkerlerdi qamtamasyz etýge baǵyttalǵan», dedi mınıstr.
Onyń sózine qaraǵanda, zań jobasynda ǵylymdy basqarý júıesindegi strategııalyq, ákimshilik jáne sarapshy qyzmetterdi bólý qarastyrylǵan. Sheshim qabyldaýda ǵylymı qaýymdastyqtyń rólin kóterýge, sondaı-aq quramyna qazaqstandyq ǵalymdar men shetel mamandary kiretin Ulttyq ǵylymı keńesterdi qurý arqyly ǵylymı jobalardy irikteý rásiminde táýelsizdikti qamtamasyz etýge mańyz beriledi. Memlekettik qarjylandyrýǵa úmitker ǵylymı jobalardyń táýelsiz halyqaralyq saraptamasy engiziledi. Ol úshin Memlekettik ǵylymı tehnıkalyq saraptamanyń ulttyq ortalyǵy qurylady. Zań jobasynda ǵylymı jáne ǵylymı-tehnıkalyq qyzmetti memlekettik bıýdjet esebinen úsh tetik boıynsha atap aıtqanda, bazalyq, granttyq jáne baǵdarlamalyq-nysanaly tetikter boıynsha qarjylandyrý kózdelip otyr. Ǵylymı zertteýler «Memlekettik satyp alýlar týraly» zańnyń aıasynan shyǵarylady. Bul ózgerister ǵylymı qyzmetkerlerdiń eńbekaqysyn kóterýge múmkindik beredi.
