Úkimet forvardtyq tásilmen satyp alatyn daqyldar sanyn keńeıtti

NUR-SULTAN. QazAqparat – Forvardtyq satyp alý baǵdarlamasyna engizilgen daqyldardyń sany keńeıtilip, bólinetin qarajat ulǵaıtyldy. Úkimet otyrysynda QR Aýyl sharýashylyǵy birinshi vıtse-mınıstri Aıdarbek Saparov osyndaı málimet berdi, dep habarlaıdy QazAqparat tilshisi.

«14 qańtardan bastap «Azyq-túlik kelisim shart korporatsııasy»UK» AQ forvardtyq satyp alý baǵdarlamasy boıynsha kóktemgi egis jumystaryn júrgizý úshin aýyl sharýashylyǵy taýaryn óndirýshilerdi qarjylandyrýǵa ótinimder qabyldaýǵa kiristi.

Bul rette aǵymdaǵy jyly aldyn ala qarjylandyrýdy 80 mlrd teńgege deıin ulǵaıtý josparlanyp otyr. Bul ótken jylǵy deńgeıden 2 ese artyq», - dedi ol.

Sondaı-aq, mınıstrdiń orynbasary satyp alynatyn daqyldardyń tizbesi keńeıgenin atady. Olar: jumsaq bıdaı, qatty bıdaı, arpa, suly, kúnbaǵys, zyǵyr, raps, soıa, qaraqumyq jáne júgeri.

«Qazirgi ýaqytta 66 mlrd teńgeden astam somaǵa 374 ótinim kelip tústi. 53,5 mlrd teńgege 176 aýyl sharýashylyǵy taýarlaryn óndirýshiler qarjylandyryldy», - dedi vıtse-mınıstr.