Úkimet endi zań jobalarynyń josparyn Elbasy Joldaýynan keıin ǵana bekitetin bolady

 Búgin QR Parlamenti Senatynda ótken zań shyǵarý qyzmetin jetildirý máselelerine arnalǵan Úkimet saǵaty barysynda Ádilet mınıstri Berik Imashev osylaı málim etti.

Mınıstrdiń aıtýynsha, Memleket basshysynyń Joldaýyn júzege asyrý maqsatynda byltyrǵy jyly 3 zań jobasy daıyndalǵan. Sonymen qatar,  Ádilet mınıstrligi memlekettik organdarmen birlese otyryp, 22 zań jobasyn ázirledi. Degenmen, byltyrǵy josparda 36 qujat ázirlenýi tıis edi. Onyń 14-i jospardan alynyp tastalǵan.

«2012 jyldyń zań jobalaý josparyna kelsek, bıyl Úkimet 34 zań jobasyn daıarlaýdy kózdep otyr. Onyń ishinde Ádilet mınıstrligi 7 zań jobasyn ázirleıtin bolady», - deıdi Berik Imashev.

Aldaǵy josparlarǵa toqtalǵan mınıstr, endi Úkimet zań jobalarynyń josparyn tek jylsaıynǵy Memleket basshysynyń Joldaýy jarııalanǵannan keıin ǵana bekitýdi kózdep otyrǵanyn jetkizdi. «Ózderińizge belgili qalyptasqan tájirıbege sáıkes, Elbasy Joldaýynan keıin Parlamentke mindetti túrde qandaı da bir zań jobasyn usyný qajettigi týyndaıtyn bolyp júr. Bul Úkimettiń zań shyǵarý josparyn ózgeriske túsiredi», -deıdi B. Imashev.

Onyń aıtýynsha, Parlamentke jospardan tys engiziletin zań jobalary da ájeptáýir problema týǵyzady. Máselen, byltyr memlekettik organdarmen josparda qarastyrylmaǵan 22 zań jobasy usynylǵan.