Úkimet eńbek naryǵynda kásibı qaterlerdi basqarýdyń zamanaýı júıesine kóshedi
ASTANA. QazAqparat - Búgin Parlament Májilisiniń jalpy otyrysynda palata depýtattary «Eńbek qaýipsizdigi men gıgıenasyna járdemdesetin negizder týraly konventsııany (187-konventsııa) ratıfıkatsııalaý týraly» zań jobasyn maquldady.
QR Densaýlyq saqtaý jáne áleýmettik damý mınıstri Tamara Dúısenovanyń aıtýynsha, atalǵan Konventsııany qabyldaýǵa qajetti jaǵdaılar men alǵysharttar elimizde qalyptasqan. «Óıtkeni, búgingi kúni qyzmetkerler densaýlyǵy zaqymdanýynyń kásibı qater deńgeıi ózekti máselege aınalyp otyr», - deıdi vedomstvo basshysy. Onyń sózine qaraǵanda, Qazaqstanda qamtylǵandardyń árbir besinshisi zııandy jáne qaýipti eńbek jaǵdaıynda jumys istep otyr.
«Qazirgi ýaqytta Úkimet eńbekti qorǵaýdy basqarýdyń ornyn toltyrýshy, shyǵyndy úlgisinen, óndiristegi qyzmetkerlerdiń densaýlyǵyn saqtaýdyń perventıvtik tásilderin iske asyrýǵa jáne qolaısyz eńbek jaǵdaılarymen baılanysty shyǵystardyń barlyq túrlerin qysqartýǵa múmkindik beretin jumystardy júrgizýde. Bul kásibı qaterlerdi basqarýdyń zamanaýı júıesine kóshýdi bildiredi. Osy maqsatta Halyqaralyq eńbek uıymynyń 187 konventsııasyn ratıfıkatsııalaý usynylady», - deıdi mınıstr T.Dúısenova.
Onyń aıtýynsha, eńbekti qorǵaýdyń qoldanystaǵy júıesi men elimizdiń zańnamasy konventsııa erejelerine sáıkes keledi. Qazirgi ýaqytta elimizdiń eńbekti qorǵaý salasyndaǵy ulttyq saıasaty óndiristik qyzmet nátıjesine qaraǵanda, qyzmetkerlerdiń ómiri men densaýlyǵyn qorǵaýǵa negizdelgen.
«Jalpy, eńbekti qorǵaý salasyndaǵy halyqaralyq mindettemelerdi qabyldaý áleýmettik jańǵyrtý qaǵıdalaryna jaýap beredi jáne bul Elbasynyń qaýipsiz eńbek jaǵdaılaryn qamtamasyz etý jónindegi tapsyrmasyn iske asyrýǵa baǵyttalyp otyr», - deıdi Tamara Dúısenova. Toqtala ketetin jaıt, atalǵan konventsııany Halyqaralyq eńbek uıymyna múshe 25 el, sonyń ishinde TMD aýmaǵynda Reseı men Moldova ratıfıkatsııalaǵan.
Parlament Májilisi maquldaǵan zań jobasy Senatqa joldanady.
