Úkimet eń tómengi standarttar boıynsha ózgeristerdi jeltoqsan aıyna deıin engizedi - S. Ábdenov
ASTANA. 16 mamyr. QazAqparat - Elbasynyń tapsyrmasyna sáıkes, Úkimet quramyna kiretin mınıstrlikter elimizdegi eń tómengi standarttar boıynsha tıisti usynystardy aǵymdaǵy jyldyń jeltoqsan aıyna deıin engizedi.
Bul týraly búgin Parlament Senatynyń jalpy otyrysynda «Qazaqstan Respýblıkasynda zeınetaqymen qamsyzdandyrý týraly» zań jobasyn talqylaý barysynda Eńbek jáne halyqty áleýmettik qorǵaý mınıstri Serik Ábdenov málim etti.
Atalmysh standarttarǵa, eń tómengi kúnkóris deńgeıi, eń tómengi jalaqynyń, zeınetaqynyń mólsheri kiretin bolady. «Sonymen qatar, búgingi zeınetaqyny jańǵyrtýǵa qatysty usynystar, alǵashqy kezeńdegi qadam bolyp tabylady. Al odan keıingi bıýdjetten shyǵyndy qajet etetin usynystardy qyrkúıekke deıin berý kózdeledi. Munda bazalyq zeınetaqy mólsherine de qajetti ózgerister qarastyrylyp otyr. Qazirgi tańda bizdiń mınıstrlik osyndaı usynystar jasady», - dedi S. Ábdenov.
Onyń aıtýynsha, zeınetaqyny jańǵyrtýǵa baǵyttalǵan ózgeristerdiń basty qaǵıdaty - azamattardyń keleshektegi zeınetaqysynyń mólsherin alyp otyrǵan jalaqysynyń 40 paıyzynan kem bolmaıtyn jaǵdaıdy qamtý. «Qazirgi tańda zeınetaqynyń tabysqa shaqqandaǵy jalpy mólsheri 44,8 paıyzdy qurap otyr. Ókinishke qaraı, bul kórsetkish tómendeı beredi. Óıtkeni, bıýdjetten beriletin qoldaý da azaıa túsedi», - dedi mınıstr.
