Úkimet eń tómengi kúnkóris shegi kólemin qazirgi shynaıy turmysqa beıimdeý kerek - senator

ASTANA. QazAqparat - Qazaqstandaǵy kedeıler sanyn naqty anyqtap alýymyz qajet. Mundaı pikirdi búgin Senattaǵy Elbasynyń azamattardy áleýmettik qorǵaý boıynsha bergen tapsyrmalarynyń oryndalýy qaralǵan Úkimet saǵatynda senator Murat Baqtııaruly bildirdi, dep habarlaıdy QazAqparat tilshisi.

"Bizdiń elimizdegi kedeılerdiń sany qansha? Jalpy kedeıshilikti ólsheý tetikteri qandaı? Eń tómengi kúnkóris deńgeıi qazirgi naryqtyq jaǵdaıǵa saı kele me? Ony esepteý sharttary durys pa? Bul úlken jáne eń negizgi másele. Kórshi Reseı eli ózindegi kedeılerdiń sanyn 18 mln dep anyq kórsetip, ony tómendetýdiń joldaryn jasap jatyr. Biz de kedeılerimizdiń sanyn naqty anyqtap alýymyz qajet", - dedi M.Baqtııaruly.

Senatordyń dereginshe, elimizdegi kúnkóristiń eń tómengi deńgeıi 2019 jyly 29 698 teńge boldy. Al Eýrazııalyq ekonomıkalyq odaqqa kiretin Reseıde 64 800 teńge, Belarýsta 38 400 teńge, Armenııada 43 300 teńge, Qyrǵyzstanda 25 876 teńgeni quraıdy.

"Elimizdegi eń tómengi kúnkóris shegi kúnine 990 teńge kiris kiretinder sanalsa, BUU standarty boıynsha eń tómengi kúnkóris sheginiń kólemi 5 dollar, ıaǵnı, 1875 teńge bolyp eseptelinedi. Sondyqtan Úkimet birinshiden eń tómengi kúnkóris shegi kólemin qazirgi shynaıy turmysqa, ómir sapasyna beıimdep, oǵan jumsalatyn qarjy kózderin izdese deımiz", - dedi ol.

Sondaı-aq ol zamattyq qyzmetkerlerdiń jalaqysyn 30 paıyzǵa kóbeıtý bul óte der kezinde jasalyp otyrǵanyn atap ótti.

"Degenmen laýazymdyq jalaqyny esepteý kezinde qoldanylatyn bazalyq laýazymdyq jalaqy deńgeıi tómen qalyp otyr. Mundaı jaǵdaıda azamattyq qyzmetkerlerdiń kóbisi memlekettik turǵyn úı baǵdarlamasyna qatysa almaıdy. Jalpy, keleshekte bazalyq laýazymdyq jalaqyny zańmen bekitilgen aılyq jalaqynyń eń tómengi kólemimen almastyrý qarastyrylsa deımiz", - dedi senator.