Úkimet elimizge qansha veterınarlyq pýnkt qajet ekenin taldaıdy
NUR-SULTAN. QazAqparat – QR Premer-mınıstri Asqar Mamın «Aýyl – El Besigi» jobasy men óńirlik standarttar júıesine tıptik veterınarııalyq pýnktter qurylysy ındıkatoryn engizý týraly depýtat saýalyna jaýap berdi, dep habarlaıdy QazAqparat.
«Búgingi tańda óńirlerdi tıptik veterınarııalyq pýnkttermen qamtamasyz etý úshin Aýyl sharýashylyǵy mınıstrigi men jergilikti atqarýshy organdar qurǵan veterınarııalyq pýnktterge, stantsııalarǵa talaptar ázirlenýde. Olardyń jobalary maquldaý satysynda tur. Qorytyndylary boıynsha veterınarııalyq pýnktterdiń qajetti sanyna taldaý júrgiziledi, qarjylandyrý máselelerin sheshý jáne «Aýyl-El Besigi» jobasy aıasynda olardy salý múmkindigimen 2025 jylǵa deıingi Óńirlerdi damytý memlekettik baǵdarlamasyna tıisti ózgerister engizý kózdelgen», - dep jaýap berdi Asqar Mamın depýtattyq saýalǵa.
Onyń aıtýynsha, jergilikti atqarýshy organdar aýdandarda 203 veterınarııalyq stantsııa, aýyldyq okrýgterde – 2 319 veterınarııalyq pýnkt qurdy.
«JAO derekterine sáıkes, aýdandardaǵy veterınarlyq dárigerlerdiń 3 122 shtaty bar, onyń ishinde 1 055 veterınarlyq maman (34,7%) jáne 2 067 qosalqy maman (65,3%) bar. Aýyldyq okrýgterdiń veterınarlyq pýnktterinde 10 485 shtat bar, onyń 9 459-y veterınarlyq mamandar (91%)», - dep túıindedi Premer-mınıstr.
