Úkimet elimizdiń 5 jyldyq áleýmettik-ekonomıkalyq damý boljamyn maquldady

NUR-SULTAN. QazAqparat - 2020 jyly Qazaqstannyń jalpy ishki óniminiń naqty ósimi 4,1 paıyzdy quraıtyn bolady. Bul týraly búgin Úkimet otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«2020-2021 jyldary ınflıatsııanyń jyldyq nysanaly dálizi 4,0-6,0 paıyz deńgeıinde saqtaldy. Al 2022-2024 jyldary ol dáliz 3,0-5,0 paıyz sheginde bolady. Jumyssyzdyq 2024 jyly 4,7 paıyzǵa deıin tómendeıdi. Makroekonomıkalyq boljamnyń negizinde 2020-2022 jyldarǵa arnalǵan bıýdjet parametrleri men Ulttyq qordyń boljamy ázirlendi», - dedi Rýslan Dálenov elimizdiń 2020-2024 jyldarǵa arnalǵan áleýmettik-ekonomıkalyq damý boljamyn tanystyrý barysynda.

Onyń aıtýynsha, respýblıkalyq bıýdjettiń kiristeri (transfertterdi qospaǵanda) 2020 jyly 8,0 trln teńge somasynda, 2021 jyly – 8,6 trln teńge, 2022 jyly – 9,4 trln teńge somasynda boljanady. Bıýdjet tapshylyǵyn 2020 jyly jalpy ishki ónimniń 2,1 paıyz, keıinnen 2021 jyly – 1,5 paıyzǵa deıin jáne 2022 jyly – 1,0 paıyzǵa deıin tómendetilgen mólsherinde belgileý usynylady.

«Munaılyq emes tapshylyq 2020 jyly jalpy ishki ónimniń 7 paıyzyna deıin, keıinnen 2022 jyly – 5,1 paıyzǵa deıin tómendeıdi. Osy parametrlerdi esepke ala otyryp, respýblıkalyq bıýdjettiń shyǵystary 2020 jyly 12,7 trln teńge, 2021 jyly 13,2 trln teńge, 2022 jyly – 13,6 trln teńge kóleminde belgilendi», - dedi ol.