Úkimet elimizdegi azyq-túlik baǵasyn yryqtandyrýǵa qatysty birqatar sharalar qabyldaǵaly jatyr

Bul týraly búgin Parlament Májilisinde «2011-2013 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasyn talqylaý barysynda QR Ekonomıkalyq damý jáne saýda mınıstri Janar Aıtjanova málim etti.

«2011 jyly halyqaralyq ekonomıkalyq jáne qarjy uıymdarynyń boljamy boıynsha ınflıatsııa men azyq-túlik taǵamdaryna baǵanyń ósimi joǵary qarqynda bolatyndyǵy aıtylǵan edi. Munyń ózi damyp kele jatqan memleketter úshin úlken problema bolmaq. Al elimizdegi azyq-túlik baǵasynyń ósimine birneshe sebepter bar bolyp otyr. Eń bastysy, buǵan álemdegi azyq-túlik taǵamyna baǵanyń ósýi áser etýde. Máselen, Dúnıejúzilik banktiń deregi boıynsha bıylǵy 1 aı ishinde azyq-túlik taýarynyń baǵasy 29 paıyzǵa ósken. Onyń ishinde munaıǵa álemdik baǵanyń qubylýy da azyq-túlikke áser etedi»,-dedi J. Aıtjanova.

Mınıstrdiń aıtýynsha, búgingi kúni Úkimet tarapynan azyq-túlik baǵasyn yryqtandyrýǵa qatysty birqatar jumystar atqarylýda. «Birinshiden, qysqa merzimdi sharalar qarastyrylady. Buǵan oraı ákimdikter janyndaǵy áleýmettik-kásipkerlik korporatsııalarǵa qarajat bólinip, olar halyqty arzan baǵadaǵy jemis-jıdekpen jáne kókónispen qamtamasyz etetin bolady. Ekinshiden, syrttan keletin azyq-túliktiń ımportyna baj salyǵyn tómendetýdi qarastyryp jatyrmyz. Bul rette Kedendik odaqtyń komıssııasynda kókónisterdiń birqatar túrine salyqty tómendetý týraly sheshim qabyldanǵan bolatyn. Aldaǵy ýaqytta taǵy da basqa azyq-túlikterge ımporttyq bajdy tómendetýge usynys jasap otyrmyz. Úshinshiden, elimizde azyq-túlikti tolyq qamtamasyz etý, ımporttyq táýeldilikten arylyp, baǵany qalypty ustaý úshin aýylsharýashylyq taýaryn óndirýshilerge keshendi sýbsıdııalar qarastyrmaqpyz. Bul týraly tıisti usynystar mınıstrlikterge jasalyp jatyr»,-dedi J. Aıtjanova.