Úkimet elektrondyq satyp alýlar boıynsha ózgerister engizý týraly qaýly qabyldady

dep habarlaıdy QazAqparat.

Qarjy mınıstri Bolat Jámishevtyń aıtýynsha, aǵymdaǵy jyldyń qańtarynan bastap baǵaly usynystarǵa tapsyrys berý tek elektrondyq túrmen júzege asyp keledi. Al naýryzdyń 25-indegi jaǵdaı boıynsha bul júıede 20 myńnan astam tapsyrys berýshiler tirkelse, 30 myńǵa tarta satyp alýshylar tirkelgen. Mınıstrdiń sózine qaraǵanda elektrondyq satyp alýlar tártibi engizilgennen keıin, aǵymdaǵy jyldyń ózinde 21 mlrd. teńge somasynda qarajat únemdelgen.

«Qarjy mınıstrligi ótken jyly elektrondy konkýrstardyń úlgisin jasap shyqqan bolatyn. Bul jobany engizýge qatysty aǵymdaǵy jyly Qarjy mınıstrliginiń ózi ilki aımaq retinde usynylady. Elektrondyq konkýrsty júzege asyrý memlekettik satyp alý barysynda «Elektrondyq Úkimet» komponentterimen aqparattyq yqpaldastyqty qarastyrady. Sonymen birge, elektrondyq konkýrstar uıymdastyrýshylar úshin de, áleýetti jetkizýshiler úshin de memlekettik satyp alýlardaǵy úderisterdi barynsha jeńildete túsedi», dedi B. Jámishev.

Onyń aıtýynsha, elektrondyq konkýrs júıesi memlekettik satyp alýdaǵy barlyq úderisterdi jeńildetýge septigin tıgizedi. Bul rette «Memlekettik satyp alýlar týraly» zańǵa arnaıy ózgerister engiziletin bolady. Atap aıtqanda, elektrondyq satyp alýlar boıynsha konkýrstar ótkizý merzimderin qysqartý sharalary qarastyrylady.

«Sózsiz elektrondyq konkýrs memlekettik satyp alýlar úderisi barysyndaǵy sybaılas jemqorlyq kórinisin tómendetedi. Sonymen birge, konkýrstar boıynsha únemdeý de aıtarlyqtaı júzege asady», dedi Qarjy mınıstri.