Úkimet ekonomıkanyń básekege qabilettiligin arttyrý úshin ınnovatsııalyq damýǵa den qoımaq

Indýstrııa jáne jańa tehnologııalar mınıstri Áset Isekeshevtiń sózine qaraǵanda, aǵymdaǵy jyl barlyq salalyq baǵdarlamalardyń ázirlenýimen qatar, olardyń iske asyrylatyn bolyp bekitilýimen erekshelenip otyr. Al joǵarydaǵy baǵdarlama san-salaly qujattardyń ishindegi arqalaıtyn júgi aýyr, atqararatyn mindeti mańyzdylarynyń biri.

Indýstrııa jáne jańa tehnologııalar vıtse-mınıstri Nurmuhambet Ábdibekovtiń aıtýynsha, baǵdarlama eki kezeńmen júzege asyrylady. Alǵashqy kezeńde tehnologııalyq damýdy basqarý júıesi qurylady, normatıvtik-quqyqtyq bazasy jetildiriledi, ınnovatsııalyq qoldaý baǵdarlamalarynyń jańa túrleri ázirlenedi, sondaı-aq onyń úderisterin saraptamalyq qoldaý júıesi iske qosylatyn bolady. Al ekinshi kezeń jańa baǵdarlamalardy júıeli qoldaný jáne birinshi kezeńde ázirlengen ınnovatsııalyq damýdy qoldaý tetikterimen sıpattalady. Al ekonomıkanyń básekege qabilettiligin arttyrýdy qamtamasyz etetin ulttyq ınnovatsııalyq júıeni qalyptastyrý - baǵdarlamanyń negizi maqsaty bolyp tabylady.

Aǵymdaǵy jyldyń birinshi jartysynda elimizdiń ındýstrııalandyrý kartasy boıynsha 72 jobany sátti iske qosqan Úkimet, ekinshi jartyjyldyqta taǵy 80 óndiris ornyn paıdalanýǵa berýdi jospalap otyr. Otyrysta osy jaıttarǵa keńinen toqtalǵan Indýstrııa jáne jańa tehnologııalar vıtse-mınıstri Albert Raý: «21 jeltoqsanda Elbasynyń qatysýymen Indýstrııalandyrý kartasy aıasynda 80 joba tanystyrylady. Sondaı-aq sol kúni «Qazaqstan» kontsert zalynda «Altyn sapa» atalymy boıynsha «Qazaqstannyń úzdik taýary» Prezıdenttiń arnaıy syılyǵyn jáne áleýmettik jaýapkershilik boıynsha «Paryz» syılyǵyn taǵaıyndaý sharalary ótedi», - dedi.

Joǵaryda atap ótken 80 ınvestıtsııalyq jo­ba­nyń jalpy quny - 400 mıllıard teńgeni quraıdy. Al jalpy osy jyldyń ishinde paıdalanýǵa be­riletin barlyq ınves­tı­tsııalyq jobalarǵa salynǵan qarjy 805 mıllıard teńge. 80 joba iske qosylǵan kezde elimizde 11,5 myń turaqty jumys orny ashy­lady. Al jyl ishinde júzege asyrylatyn jobalar negizinde 24 myń jumys orny qury­lady.

2011 jyldyń birinshi toqsanynda «QazSat-2» jerserigi ushyrylady

El ishinde «Qasqa at» atalynyp, ázil áńgimeniń arqaýyna aınalǵan «QazSat-1»-den keıin 2-jerserikti ushyrýdy josparlaǵan el Úkimeti ǵarysh keńistigin ıgerýdegi jumystaryna tııanaqty qaraı bastaǵan syńaıly. Selektorlyq jıynda málim bolǵanyndaı, Ulttyq ǵarysh agenttigi 2011 jyldyń birinshi toqsanynda «QazSat-2» jerserigin ushyrýdy josparlap otyr. Bul oraıda Agenttik basshysy alǵashqy spýtnıkti jasaǵan kezdegi kemshilikter eskerilip, «QazSat-2» ǵarysh apparatynyń qyzmet kórsetýiniń tehnıkalyq senimdiligin arttyrýǵa baılanysty qosymsha sheshimder qabyldanǵanyn basa aıtty. Sonymen qatar qazirgi kezde «QazSat-3» baılanys jáne habar taratý jerserigin jasaý men ushyrýǵa baılanysty baıqaýdyń ekinshi kezeńi ótkizilip jatqany da málim boldy. Eki birdeı ǵarysh apparatynyń jaı-japsaryn jiti tanystyrǵan T.Musabaev Úkimet basshysy Kárim Másimovten «Baıqońyr» ǵarysh aılaǵyndaǵy «Báıterek» ǵaryshtyq- zymyrandyq keshenniń qurylysy boıynsha jobany keleshekte qarjylandyrý máselesin sheshýdi de surady.

Onyń sózine qaraǵanda, «Báıterek» keshenin qurý boıynsha jobany júzege asyrýda bıýdjettik nesıeni jabýǵa baılanysty másele týyndap otyrǵan kórinedi. «Osyǵan baılanysty «Báıterek» ǵaryshtyq-zymyrandyq keshenin budan ári qarjylandyrý máselesi boıynsha Sizdiń qatysýyńyzben arnaıy keńes ótkizýdi suraımyz», - dedi Agenttik tóraǵasy.

Úkimet otyrysyn qorytyndylaǵan Kárim Másimov Mınıstrler Kabıneti múshelerine Údemeli ındýstrııalyq-ınnovatsııalyq damý jónindegi memlekettik baǵdarlamany eshqandaı syltaýsyz, der kezinde júzege asyrýdy qamtamasyz etýdi júktedi. Premer 21 jeltoqsanda Memleket basshysy Nursultan Nazarbaevtyń aldynda nysandardy tapsyrý is-sharasy ótetindigin, bul asa jaýapty is ekendigin aıta kele, Indýstrııa jáne jańa tehnologııalar mınıstri Áset Isekeshevke barlyq qyzmetkerlerimen jumys protsesin úılestirýdi tapyrdy. «Jaýapty nysandarda eshqandaı máseleler týyndamasyn», - dedi K. Másimov.

BEK qalyptastyrý boıynsha qujattar toptamasy maquldady

Dúısenbilik otyrystyń ystyq-sýyǵy basylmaı jatyp, ile-shala seısenbi kúni ótken Úkimet jıynynda Biryńǵaı ekonomıkalyq keńistik qalyptastyrý boıynsha qujattar toptamasy maquldandy. «Úkimet otyrysynda Biryńǵaı ekonomıkalyq keńistiktiń quqyqtyq bazasyn quraıtyn 17 kelisim maquldandy. Bul kelisimder maǵynasy boıynsha iri 4 topqa bólinedi. Birinshisi - jalpy ekonomıkalyq saıasatty úılestirilgen túrde júrgizýge negizdelgen. Atap aıtqanda, onda kelistirilgen makroekonomıkalyq saıasatty júrgizý týraly kelisim, úsh memlekettiń arasynda báskekelestikti qorǵaý týraly kelisim, sondaı-aq ónerkásip jáne aýylsharýashylyǵy mekemelerine beriletin sýbsıdııalardy biryńǵaı ustanymdarmen júrgizýge arnalǵan kelisim qamtylǵan», - dedi qujattar toptamasyn Úkimet músheleriniń nazaryna usynǵan Ekonomıkalyq damý jáne saýda mınıstri Janar Aıtjanova.

Al qujattyń ekinshi toptamasynda qyzmet kórsetetin kompanııalar men kapıtaldyń emin-erkin júrýine jaǵdaı jasaıtyn kelisimder qamtylsa, úshinshisindegi kelisimder Qazaqstan, Belarýs jáne Reseı memleketteriniń arasyndaǵy jumys kúshiniń emin-erkin jyljýyna negizdelgen. Al sońǵysynda, Qazaqstan úshin óte mańyzdy toptamada Biryńǵaı ekonomıkalyq keńistikke kiretin memleketterdiń kóliktik ınfraqurylymyn qazaqstandyq kompanııalardyń qoldanýyna arnalǵan kelisimder qamtylǵan.

QR Kólik jáne kommýnıkatsııa mınıstri Ábilǵazy Qusaıynovtyń atap ótýinshe, 2011 jyldyń 1 qańtarynan bastap Keden odaǵyna múshe elder arasynda úsh tarıftiń ornyna birizdendirilgen1 tarıf qoldanylatyn bolady. Qazirgi ýaqytta Qazaqstan, Reseı jáne Belarýs memleketterinde eksporttyq, ımporttyq jáne memlekettik tarıfterdiń qoldanylatyndyǵyn atap ótken mınıstr: «Al 2011 jyldyń 1 qańtarynan bastap úsh tarıftiń ornyna birizdendirilgen1 tarıf qoldanylatyn bolady. Biz úshin bul merzim óte tıimdi. Sebebi bul úderisti aıaqtaýymyz úshin shamamen eki jyl ýaqyt kerek», - dedi.

Sondaı-aq Biryńǵaı ekonomıkalyq keńistik elderi arasynda tranzıttik tarıf bolmaıdy. Onyń ornyna ár memlekettiń birizdendirilgen tarıfi qoldanylady. Sonymen qatar úshinshi elderden úshinshi elge tranzıttik trafık saqtalady. Taǵy bir erekshelik, eger memleket tarapynan taýar óndirýshilerge sýbsıdııa retinde kómek kórsetilmeıtin bolsa, onda Kedendik odaqtyń komıssııasy erekshe tarıf berýine bolady. Erekshe tarıfterdi belgileý taýar óndirýshilerge qoldaýdyń basqa formasyn usyný múmkin bolmaǵan jaǵdaıda kórsetilmek. Kedendik odaq komıssııasy Biryńǵaı ekonomıkalyq keńistik jáne KO aıasyndaǵy kelisilgen sheshimder qabyldaıtyn taraptardyń memlekettik organdarynan turatyn kollegııalyq organ bolyp sanalady. Sondyqtan atalǵan komıssııa deńgeıinde júk tasymaldaý úshin temirjol kóligi qyzmetterine erekshe tarıfterge kelisý temirjol tarıfterin qurý boıynsha ashyq saıasat qurýǵa múmkindik beredi.

2015 jylǵa qaraı Qazaqstan Reseı men Belarýsqa jyl saıyn 3 mlrd. kVt/saǵat elektr energııasyn eksporttaıdy

Sonymen qatar Úkimet otyrysynda Qazaqstannyń Keden odaǵy aıasynda 2015 jylǵa qaraı Reseı men Belarýsqa jyl saıyn 3 mlrd. kVt/saǵat elektr energııasyn tasymaldaýǵa qol jetkize alatyndyǵy belgili boldy. QR Premer-Mınıstriniń orynbasary Áset Isekeshevtiń atap ótýinshe, elimiz bul nátıjege baǵa qurylymdaý jáne tarıf saıasaty negizderin qosa alǵanda elektr energetıkasy salasyndaǵy tabıǵı monopolııalar qyzmetterine enýdi qamtamasyz etý boıynsha kelisimdi ratıfıkatsııalaǵannan keıin qol jetkizedi. Sondaı-aq kelisimdi ratıfıkatsııalaýdyń nátıjesinde elimiz elektr energııasyna qatysty jergilikti jerlerdegi problemalardy sheshe alady. Osy oraıda Ekibastuz stansysynyń arzan elektr energııasymen batysqazaqstandyq tutynýshylardy qamtamasyz ete alatyndyǵymyzdy basa aıtqan Á.Isekeshev: «Óıtkeni, bizdiń elektr energııa qazirgi ýaqytta olarǵa Reseıden jetkilip otyrǵan elektr energııasynan shamamen 20 paıyzǵa arzan», - dedi.

Qazaq eliniń 2018 nemese 2020 jyldary Olımpıada oıyndaryn ótkizýge múmkindigi bar

Sársenbiniń sátinde Astanada 2011 jyly ótetin 7-Qysqy Azıada oıyndarynda paıdalanylatyn sport nysandarynyń, atap aıtqanda, jabyq konkı stadıonynyń, respýblıkalyq velosıpedpen jarysý alańynyń jáne qaıta jańartylyp jatqan «Qazaqstan» sport saraıynyń qurylysymen tanysqan QR Premer-Mınıstri Kárim Másimov kelesi kúni Almatydaǵy sporttyq nysandarmen tanys boldy. Úkimet basshysy jumys saparynyń baǵdarlamasyna sáıkes «Medeý» muz aıdynyna, «Shymbulaq» taý shańǵy bazasyna jáne «Tabaǵan» kýrortyna, jańa shańǵy-bıatlon stadıonyna jáne Remızov shatqalyndaǵy shańǵy tramplınder keshenine, qaıta jańǵyrtylǵan Balýan Sholaq atyndaǵy Sport saraıyna bardy.

Aq Azıada ótetin nysandardy aralaý kezinde Premer-Mınıstrge ilesip júrgen elimizdiń Týrızm jáne sport mınıstri Temirhan Dosmuhambetov sóz oraıy kelgende Qazaqstannyń áleýeti men ekonomıkalyq múmkindigi joǵary ekendigine ekpin salyp, elimizdiń 2018 nemese 2020 jyldary Olımpıada oıyndaryn ótkizýge de shynaıy múmkindigi bar ekendigin aıtyp qaldy. Sondaı-aq ol elimizdiń Búkilálemdik ýnıversıadany ótkizýge de umtylatynyn jetkizdi. «Eger uıymdastyrý komıteti Qazaqstannyń basty eki qalasynda ótkizýge kelisim berse, onda biz Búkilálemdik ýnıversıadany ótkizýge de úmitker bolamyz. Óıtkeni bir qaladaǵy nysandar jetispeıdi, kóptep salý kerek. Sonymen qatar 7-Qysqy Azıada oıyndarynda alǵashqy úshtikke birýge bar kúsh-jigerimizdi jumsaımyz. Múmkin odan da jaqsy nátıjege qol jetkizermiz», - dedi mınıstr.