Úkimet ekonomıkadaǵy qarjy sektorynyń rólin arttyrmaq
ALMATY. QazAqparat - Qazaqstan Úkimeti qarjy sektorynyń ekonomıkadaǵy rólin arttyrýǵa daıyn. Bul týraly Almatyda Qazaqstan qarjygerleriniń VII Kongresinde QR Premer-Mınıstriniń orynbasary Erbolat Dosaev málimdedi, dep habarlaıdy QazAqparat tilshisi.
Erbolat Dosaev sharada el ekonomıkasynyń daǵdarystan keıingi kezeńge ótkenin tilge tıek etip, qazirgi jaǵdaıdaǵy basty mindetterdi atap kórsetti.
«Basty mindet - ınvestıtsııalardyń negizgi kózi rólin Qazaqstannyń qarjy ınstıtýttaryna qaıtarý, dál osyndaı róldi qarjy sektory 2008 jylǵa deıin atqarǵan bolatyn. Aldaǵy ýaqytta Ulttyq bank qarjy sektorymen birlese otyryp, sektordyń tarıhı rólin qalpyna keltirýge úmittimiz. Úkimet túbegeıli ózgeristerge ázir. Biz qarjygerlerdiń Úkimettiń moınyndaǵy jumystardy ózine alyp, bizge qajet emes fýnktsııalardan bosatýyn qalaımyz. Másele dástúrli qarjylandyrýdan bólek, basqa da qoljetimdi tetikter týrasynda bolyp otyr», - dedi Erbolat Dosaev.
Úkimet basshysynyń orynbasary qarjy sektoryndaǵy problemalardy da atap ótti.
«Bank sektory - qorlandyrý men qarjylandyrýdyń negizgi kózi. Qarjylandyrýdyń naryqta bolýy tıis basqa formalary, sonyń ishinde qor naryǵy bizde áli damytylmaı jatyr. Biz osy baǵyttardy damytý boıynsha jumystardy jalǵastyrýǵa daıynbyz. Qoljetimdi kredıt kásipkerlikti damytýdyń kilti bolýy tıis. Bul týraly aıtyp jatyrmyz. Biraq naryqta kimniń qandaı ról atqaratyndyǵy naqtylanbaǵan», - dedi Dosaev.
