Úkimet DSU shekteýlerin eskere otyryp bıznesti qoldaýdyń jańa sharalaryn qabyldaýy tıis - Prezıdent

NUR-SULTAN. QazAqparat – Úkimet Dúnıejúzilik saýda uıymy shekteýlerin eskere otyryp bıznesti qoldaýdyń jańa sharalaryn qabyldaýy qajet. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«1 qyrkúıekke deıin offteık kelisimsharttar, ıaǵnı ónimdi kepildikpen satyp alý júıesi arqyly óndiris qurý jáne keńeıtý boıynsha keshendi jospardy bekitýdi tapsyramyn»,- dedi Memleket basshysy.

Qasym-Jomart Toqaev jergilikti óndirýshilerdi yntalandyrýdyń sanattyq satyp alýyn jáne ózge de tetikterin keńinen qoldaný boıynsha jumys júrgizý qajettigin basa aıtty.

«Atameken» ulttyq kásipkerler palatasyna osynaý protseske qatysýdy ótinemin. Osy jyldyń 1 qańtarynan bastap Dúnıejúzilik saýda uıymynyń otandyq bıznesti qoldaýdy shekteý boıynsha qatań talaptary kúshine endi. Úkimet pen palata atalǵan uıymnyń talaptaryn eskere otyryp, jańa sharalar qabyldaýy tıis», - dedi QR Prezıdenti.