Úkimet din salasyndaǵy memlekettik saıasat tujyrymdamasyn talqylady
ASTANA. QazAqparat - Búgin QR Úkimetiniń selektorlyq rejimdegi otyrysynda din salasyndaǵy memlekettik saıasat tujyrymdamasy talqylandy, dep habarlaıdy QazAqparat.
Atalǵan másele boıynsha baıandama jasaǵan QR Din isteri jáne azamattyq qoǵam mınıstri Nurlan Ermekbaevtyń aıtýynsha, Qazaqstan halqy ulttyq dástúrge, qazirgi zamanǵy aqıqatqa negizdelgen jáne dinı qaǵıdalardyń ishinen meıirimdilikti ustanatyn, jat pikirler men keńesterge eliktemeıtin memleket retinde memleket pen dinniń qarym-qatynasynda ózindik model qalyptastyrýǵa quqyly ekendigin atap ótti.
«Sizderdiń nazarlaryńyzǵa usynylyp otyrǵan din salasyndaǵy memlekettik saıasattyń 2017-2020 jyldarǵa arnalǵan tujyrymdamasy osy modeldiń negizi bolyp tabylady. Osy tujyrymdamamen jumys isteý barysynda Prezıdenttiń «memlekettiń zaıyrlylyq qaǵıdatyn nyǵaıtý, kez kelgen dinı radıkalızmdi boldyrmaý» nusqaýlaryn basshylyqqa aldyq. Tujyrymdamanyń maqsaty dinı salany retteý boıynsha 2020 jylǵa deıingi ǵylymı teorııalyq negizderdi aıqyndaý, eldegi din salasyn retteý boıynsha zańnamalyq basqarýshylyq, áleýmettik-ekonomıkalyq sharalardy anyqtaý bolyp tabylady. Ony iske asyrý qoǵamda jáne jalpy rýhanı salada turaqty ári úılesimdi damýdy, jańǵyrýdy qamtamasyz etedi», - dedi mınıstr.
Sonymen qatar ol elimizdiń budan keıingi damý bolashaǵy din salasyndaǵy memlekettik saıasattyń pármendiligimen tyǵyz baılanysty ekendigin basa aıtty.
Tujyrymdama jobasyn talqylaý barysynda Májilis depýtaty Janat Jarasov atalǵan qujattyń negizgi ıdeıalaryna qoldaý kórsetip, basty erejeleriniń pármendiligin arttyra túsý úshin qoǵam men memleket damýynyń odan ary birizdi damýyn qamtamasyz etý maqsatynda osy saladaǵy zańnamalardy jetildirý qajettigin atap ótti.
