Úkimet delegatsııasy Almatydaǵy jańa áleýmettik saıasattyń iske asyrylýy barysymen tanysty
Túske deıin Vıtse-premer, Eńbek jáne halyqty áleýmettik qorǵaý mınıstri, qala ákimi «Baqytty otbasy» jáne «Belsendi uzaq ómir» Jol kartalarynyń iske asyrylýy jóninde keńes ótkizdi.
Elbasy N.Á. Nazarbaevtyń tapsyrmasy boıynsha elimizde jańa áleýmettik saıasat iske asyrylýda. Basty mindet - azamattarymyzdyń ómir súrý sapasy men ál-aýqatyn arttyrý.
Búginde qalada kópbalaly analar men qart adamdardy qoldaýǵa baǵyttalǵan «Baqytty otbasy» jáne «Belsendi uzaq ómir» jol kartalary iske asyrylyp jatyr. 13 shara qarastyrylǵan Jol kartasy bekitildi. «Bir tereze» prıntsıpi boıynsha qurylǵan «Baqytty otbasy» ortalyǵy ashylýda. Onda zańgerler, psıhologtar, jattyqtyrýshylar jáne t.b. jumys isteıtin bolady.
«Baqytty otbasy» qaıyrymdylyq qory qurylyp, metsenattar men jurtshylyqtyń arqasynda 131 mln teńgeden astam qarajat jınaldy. 1 myńnan astam otbasyna materıaldyq kómek kórsetildi.
Almaty elimizde alǵash bolyp «Baqytty otbasy» jeńildetilgen turǵyn úı baǵdarlamasyn iske qosty. Mamyr aıynyń ózinde 30 otbasyn baspanamen qamtamasyz etý josparlanyp otyr. Qazirgi áleýmettik tólemderdiń mólsheri ósti. Atap aıtqanda, qıyn jaǵdaıǵa tap bolǵan azamattarǵa beriletin bir jolǵy áleýmettik kómek 10 aılyq eseptik kórsetkishten (25 250 teńge) 20 aılyq eseptik kórsetkishke deıin (50 500 teńge) kóbeıdi. Bul shara 10 myńnan astam otbasyny qamtıdy.
Sodan keıin G. Ábdiqalyqova jáne B. Saparbaev aýdandardyń ákimderimen, iri kásiporyndardyń, bıznes-qurylymdar men kásipodaq uıymdarynyń basshylarymen kezdesip, onda áleýmettik áriptestik máselelerin talqylady.
2015 jyldan bastap bıznestiń áleýmettik jaýapkershiligi aıasynda 25,7 mlrd teńgeniń 40-tan astam jobasy iske asyrylyp keledi. Búgingi kúni 21,6 mlrd teńgeniń 32 jobasy iske asyryldy. 7 balabaqsha, 1 emhana, feldsherlik-akýsherlik pýnkt jáne t.b. salyndy.
Kópbalaly analarmen kezdesý barysynda vıtse-premer memleket azamattardyń az qamtylǵan sanattaryna áleýmettik qoldaý kórsetýge baǵyttalǵan sharalar qabyldap jatqanyn atap ótti. 1 sáýirden bastap ataýly áleýmettik kómek kórsetý talaptary eń tómengi kúnkóris deńgeıiniń 70%-na deıin artyp, 20 789 teńgeni qurady.
Mamyr aıynan bastap jalǵa beriletin turǵyn úı bóline bastaıdy, al 1 maýsymnan bastap bıýdjet salasyndaǵy jalaqysy tómen qyzmetkerlerdiń eńbekaqysy kóbeıedi. Bilim berý jáne densaýlyq saqtaý júıesindegi qyzmetterdiń sapasyn arttyrý boıynsha sharalar qabyldanatyn bolady. Sondaı-aq, jumys tobynyń músheleri jańa áleýmettik saıasat aıasynda iske asyrylyp jatqan jańalyqtar týraly aqparat berdi.
S.Asfendııarov atyndaǵy Ulttyq medıtsına ýnıversıtetiniń jataqhanasyn aralaý barysynda Premer-Mınıstrdiń orynbasary «Elbasynyń bes áleýmettik bastamasyn» iske asyrý aıasynda Tuńǵysh Prezıdent tapsyrmasynyń oryndalý barysymen tanysty.
Gúlshara Ábdiqalyqova jumys saparynyń sońynda joǵary oqý oryndarynyń rektorlarymen kezdesý ótkizdi. Kezdesýde stýdent jastardyń ómir súrý jaǵdaıyn jaqsartý jónindegi úshinshi bastamanyń iske asyrylý týraly aqparat tyńdaldy, joǵary bilim berýdegi ózekti máseleler talqylandy.
Joǵaryda atalǵan bastamany oryndaý úshin qalada stýdent jataqhanasyn salý jalǵasýda. 39 joǵary oqý orny jumys isteıdi, onda 149 myń adam bilim alady, onyń 92 myńnan astamy basqa qalalardan kelgen stýdentter. Barlyǵy 95 jataqhanada 30 myń (33%) stýdent turady.
2018 jyly joǵary oqý oryndarynyń óz qarajatynyń esebinen 1 200 orynǵa arnalǵan 3 jataqhana paıdalanýǵa berildi. 2019 jyly da óz qarajattary esebinen 2 340 orynǵa arnalǵan 5 jataqhanany aıaqtaý josparlanýda.
Kezdesýdiń qorytyndysy boıynsha Premer-Mınıstrdiń orynbasary G. Ábdiqalyqova jataqhanalardy ýaqytyly jáne sapaly paıdalanýǵa berýdi qamtamasyz etý, stýdentterge qolaıly jaǵdaılar jasaý úshin qajetti sharalar qabyldaý jóninde joǵary oqý oryndarynyń rektorlaryna, memlekettik organdardyń basshylaryna birqatar naqty tapsyrmalar berdi.
Eske sala ketsek, 25 sáýirde QR Premer-Mınıstriniń orynbasary Gúlshara Ábdiqalyqova bastaǵan úkimet delegatsııasy Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý úshin Almaty qalasyna keldi.
