Úkimet dárigerlerdiń jalaqysyn qalaı kóteredi - Birtanovtyń jaýaby
ASTANA. QazAqparat - Atalǵan bastamany iske asyrýdyń birneshe joly bar. Alaıda mınıstrlik óz tarapynan tegin medıtsınalyq kómektiń aqshasyn arttyrý arqyly dárigerlerdiń jalaqysyn kóterýdi kózdeıdi, dep habarlaıdy QazAqparat tilshisi.
QR Densaýlyq saqtaý mınıstri Eljan Birtanovtyń aıtýynsha, búginde dárigerler, meıirbıkeler jáne taǵy basqa medıtsına mamandarynyń jalaqysyn kóterý boıynsha arnaıy jumys toby quryldy. Onyń quramynda bılik ókilderi de, sarapshy mamandar da bar. "Árıne, jalaqyny kóterýdiń ádistemelik joldary bar. Biraq birinshi másele, ol - tarıfti kóterý (tegin memlekettik kómektiń aqshasyn - avt.). Qazirgi kezde biz tıisti jumystardy atqaryp jatyrmyz. Aldaǵy birneshe aıdyń ishinde barlyq tarıfterdi qaıta qaraımyz. Mysaly, alǵashqy medıtsınalyq kómek deńgeıindegi tarıfterdi kóterý kerek. Al úlkeıtilgen tarıfter aldymen mamandardyń jalaqysyn kóterýge jumsalýy qajet. Oǵan bárimiz baqylaý jasaımyz. Sebebi 85 protsent medıtsınalyq mekemelerdiń jalaqysy bas dárigerdiń qolynda. Múmkindikter kóp. Ókinishke qaraı, bas dárigerler sonyń bárin durys paıdalanbaıdy", - dedi E.Birtanov keńeıtilgen alqa májilisinde.
Aıta keteıik, buǵan deıin mınıstrliktiń tapsyrysy boıynsha dárigerlerdiń qazirgi ortasha jalaqysy anyqtalyp, ony naqty qaı mejege deıin kóterý qajettigi belgilengen bolatyn. Zertteýge sáıkes, dárigerlerdiń jalaqysy 200 myń teńgeden kem bolmaýy tıis.
