Úkimet dárigerlerdiń materıaldyq jaǵdaıyn jaqsartýy kerek - Toqaev
ASTANA. QazAqparat - Úkimet densaýlyq saqtaý salasy qyzmetkerleriniń materıaldyq jaǵdaıyn jaqsartý boıynsha tıisti sharalar qabyldaýy qajet. Bul týraly QR Parlamenti Senatynyń tóraǵasy Qasym-Jomart Toqaev málim etti, dep habarlaıdy QazAqparat.
«Ýaqtyly medıtsınalyq kómek kórsetý, onyń qoljetimdiligi men sapasyn qamtamasyz etý - bul salanyń basty mindeti. Elbasy qańtar aıyndaǵy Joldaýynda osy salanyń aldyndaǵy birqatar naqty mindetterdi anyqtaǵan bolatyn. Soǵan sáıkes, naýqastardy emdeýde qymbatqa túsetin statsıonarlyq emge qaraǵanda, negizinen aýrýdyń aldyn alýǵa baǵyttalǵan sharalarǵa basymdylyq berýdiń, aýrýdy ýaqtyly anyqtaý men emdeýdi qamtamasyz etetin jańa tehnologııalardy engizýdiń mańyzy zor. Sonymen qatar, tegin medıtsınalyq kómektiń jańa modelin ázirleý, medıtsına mamandarynyń sapasyn kóterý jáne densaýlyq saqtaý júıesin tsıfrlandyrý kezek kúttirmeıtin máselelerdiń qatarynda. Elimizde densaýlyq saqtaý máselelerine únemi erekshe mán berilip keledi. Jetkilikti zańnamalyq baza qalyptastyrylyp, salany qarjylandyrý aıtarlyqtaı arttyrylýda. Osyndaı saıasattyń nátıjesinde, jalpy bul salada ilgerileý bar. Atap aıtqanda, halyqtyń tabıǵı ósýi artyp, ana men bala ólimi azaıdy. Birqatar áleýmettik mańyzy bar aýrýlar boıynsha syrqattaný deńgeıi tómendedi», - dedi Toqaev Senattaǵy «Úzdik densaýlyq saqtaý isi - deni saý ult» taqyrybyndaǵy parlamenttik tyńdaýda.
Onyń sózine qaraǵanda salada aıtarlyqtaı eleýli tabysqa qol jetikizilgenimen, áli kúnge deıin sheshimin tappaǵan birqatar máseleler bar.
«Olar eń aldymen, medıtsınalyq qyzmettiń qoljetimdiligi men tıimdiligine baılanysty. Medıtsına mamandaryn daıarlaýdyń sapasy men olardy tıisti jumys jaǵdaıymen qatamasyz etý asa mańyzdy másele bolyp otyr. Medıtsına qyzmetkerleriniń eńbekaqylaryn arttyrý jáne yntalandyrýdyń tıimdi júıesin qalyptastyrý - kún tártibindegi mańyzdy mindetterdiń biri. Úkimet densaýlyq saqtaý salasy qyzmetkerleriniń materıaldyq jaǵdaıyn jaqsartý boıynsha tıisti sharalar qabyldaýy qajet. Memleket basshysynyń jýyrdaǵy úndeýinde aıtylǵan aýqymdy áleýmettik jobalardy ońtaıly júzege asyrý - azamattardyń, sonyń ishinde medıtsına qyzmetkerleriniń de turmys jaǵdaıyn jaqsartary anyq», - dedi ol.
Q. Toqaevtyń atap ótýinshe, elimizde medıtsınalyq joǵary oqý oryndary jyl saıyn 4 myńnan astam mamandardy daıarlaıtynyna qaramastan, osy salada, ásirese aýyldyq jerlerde baıqalyp otyrǵan maman tapshylyǵy alańdatady.
«Olardyń kásibı daıyndyǵynyń sapasy da suraq týdyrýda. Keıbir jekelegen saraptama nátıjesine sáıkes, medıtsınalyq joǵary oqý oryndaryn bitirýshi túlekterdiń árbir tórtinshisi ǵana tańdaǵan mamandyǵy boıynsha qyzmet etýde. Medıtsınalyq joǵary oqý oryndaryna qabyldanatyn stýdentterdiń sanyna emes, olardy daıyndaýdyń sapasyna kóbirek kóńil bólgen jón», - dedi Senat tóraǵasy.
