Úkimet bıýdjettik baǵdarlamalardy kelisý merzimin qysqartady

ASTANA. QazAqparat - Búgin Úkimet otyrysynda QR Ulttyq ekonomıka mınıstri Tımýr Súleımenov «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn tanystyrdy, dep habarlaıdy QazAqparat.

Zań jobasynda bıýdjet zańnamasyna negizgi 6 baǵyt boıynsha  túzetýler usynylady.

«Birinshi baǵyt boıynsha bıýdjettik baǵdarlamalardyń iske asyrylýyn jeńildetý maqsatynda olardy kelisýdiń jekelegen kezeńderin alyp tastaý usynylady. Birinshiden, strategııalyq josparlar ázirlemeıtin memlekettik organdardyń bıýdjettik baǵdarlamalaryn Ulttyq ekonomıka mınıstrligimen kelisýsiz bekitý. Qarjy mınıstrligimen kelisý qalady. Ekinshiden, bıýdjetti túzetý kezinde bıýdjettik baǵdarlamalarǵa Ulttyq ekonomıka mınıstrligimen kelisýsiz  ózgerister engizý. Qarjy mınıstrligimen kelisý saqtalady. Úshinshiden,  memlekettik organdardyń bastamasymen bıýdjettik baǵdarlamalarǵa Ulttyq ekonomıka mınıstrligimen jáne Qarjy mınıstrligimen kelisýsiz, biraq Qarjy mınıstrligin habarlandyryp, ózgerister engizý. Bul bıýdjettik baǵdarlamalardy kelisý merzimin árbir kezeńde orta eseppen 10 kúnge qysqartýǵa múmkindik beredi», - dep túsindirdi mınıstr.

Sonymen qatar búginde bıýdjettik baǵdarlamalardy kóbine qaıtalaıtyn nysanaly damý transfertterdiń nátıjeleri týraly kelisimderdi alyp tastaý usynylyp otyr. Nátıjesinde, ortalyq jáne jergilikti deńgeılerdegi 1,5 myńnan astam qujat qysqartylady.

«Ortalyq memlekettik organdardyń ákimshilik shyǵyndaryn Qarjy mınıstrligi aıqyndaıtyn jalpy lımıtpen josparlaý usynylyp otyr. Bul bıýdjettik ótinimderdi daıyndaýdy jeńildetedi, onyń qarastyrý merzimin jáne usynylatyn qujattardyń kólemin qysqartady»,-deıdi Súleımenov.