Úkimet bıznestiń problemalaryn biledi jáne ol erekshe nazarda – Álıhan Smaıylov

NUR-SULTAN. QazAqparat – «Atameken» ulttyq kásipkerler palatasynyń kezekten tys ІH sezinde QR Premer-Mınıstri Álıhan Smaıylov otandyq bıznesti damytýǵa qatysty oıyn ortaǵa saldy, dep habarlaıdy QazAqparat tilshisi.

«Búgin - búkil bıznes-qoǵamdastyq úshin mańyzdy kún. Sizder palatanyń jańa tóralqa músheleri men tóraǵasyn saıladyńyzdar. Osy rette, Abylaı Isabekulyna elimizdegi kásipkerlikti damytýǵa qosqan kóp jylǵy jumysy úshin alǵys aıtamyz. Tóralqanyń jańa músheleri men tóraǵasy Raıymbek Batalovqa tabys tileımiz. Raıymbek Ánýaruly bıznes salasynda tájirıbeli azamat. Bıznes-qoǵamdastyqtyń talap-tilegin jaqsy biledi. Úkimet bıznestiń problemalaryn biledi jáne olardy sheshý máselesin erekshe nazarynda ustaıdy», - dedi Álıhan Smaıylov.

Úkimet basshysynyń aıtýynsha, qazir kásipkerlik salasyndaǵy ózekti problemalardy sheship, qazaqstandyq bıznestiń odan ári órkendeýine jol ashý kerek.

«Ótken jyly birinshi vıtse-premer retinde shaǵyn jáne orta bıznesti damytý jóninde apta saıyn keńes ótkizdik. Keńeste 18 qyzmet salasy boıynsha bıznestiń 160-tan astam máselesin qaradyq. Osy problemalardyń shamamen 75%-i oń sheshimin tapty. Keshe memlekettik organdar men palata ókilderiniń qatysýymen ótken keńeste 250-den astam másele qosymsha aıtyldy. Búgin olar týraly taǵy da baıandaldy. Úkimet aldaǵy ýaqytta osy máselelermen belsendi aınalysady», - deıdi ol.

Sondaı-aq, Premer-Mınıstr bızneske qatysty ár problemanyń muqııat qaralatynyn aıtty.