Úkimet bıznestiń ósip-órkendeýine naqty qoldaý kórsetpeıtin bolsa, kásipkerler básekelestikke aldaǵy onjyldyqta da daıyn bolmaıdy - «dóńgelek ústelge» qatysýshylar
; ALMATY. Aqpannyń 15-i. QazAqparat /Erlik Erjanuly/ - Kedendik odaq qazaqstandyq kásipkerlerdi Reseı men Belarýstiń zaýyt-fabrıkalarymen básekelesýge májbúr etedi. Bul búgin Almatyda "Qazaqstandy Kedendik odaqta ne kútip tur?" degen taqyrypta ótip jatqan «dóńgelek ústel» jıynynda aıtyldy,
dep habarlaıdy QazAqparat.
"Reseı men Belarýs Keden odaǵyna bizge qaraǵanda daıyn sııaqty. Olardyń ónim shyǵarý jaǵdaıy joǵary deńgeıde. Sondaı-aq onda keńestik dáýirde salynǵan óndiris oryndarynyń kópshiligi áli jumys istep tur. Úkimet olarǵa óndiristi qazirgi zamanǵy jańa qural-jabdyqtarmen jańartýǵa, qarjylyq, nesıelik quraldarǵa qol jetkizýine kómektesip, shıkizatpen qamtamasyz etilýine qoldaý jasap otyr. Sondyqtan, buǵan deıin Qytaı ekonomıkasyna jumys jasap kelsek, endi Reseı ekonomıkasynyń damýyna jumys jasaıtyn bolamyz", deıdi "Dıdar-Barys" JShS-niń dırektory Begaly Myrzabekov. Onyń aıtýynsha, respýblıkadaǵy qazirgi ahýal shaǵyn kásipkerliktiń ortaǵa, al ortashanyń iri bızneske aınalýyn yntalandyrmaıdy. Naqty ónim shyǵaratyn kásiporyndarǵa jeńildik kerek. Qytaı men Reseıde bul durys jolǵa qoıylǵan. Úkimette jasalatyn shaǵyn jáne orta bıznesti qoldaýǵa qatysty baǵdarlamalar men jobalardy júzege asyrýdyń tetikteri jetildirilmegen.
