Úkimet bıznesti qoldaýǵa qatysty jumysty jalǵastyrady - Premer-Mınıstr
NUR-SULTAN. QazAqparat – Úkimet bıznesti qoldaý boıynsha keshendi sharalardy iske asyrý arqyly jumysty jalǵastyratyn bolady. Bul týraly Úkimet otyrysynda bıylǵy qańtar-naýryz aıyndaǵy áleýmettik-ekonomıkalyq damýdy talqylaý kezinde QR Premer-Mınıstri Asqar Mamın málim etti, dep habarlaıdy QazAqparat tilshisi.
«Birinshi toqsannyń qorytyndysy boıynsha ekonomıkanyń naqty sektorynda oń jáne turaqty dınamıka baıqaldy. Atap aıtqanda, óńdeý ónerkásibi 7,5 paıyz, qurylys 13,1 paıyz jáne aýyl sharýashylyǵy - 2,8 paıyz dengeıinde turaqty, ári ornyqty ósýde. Sonymen qatar mashına jasaýda 21,8%, onyń ishinde avtomobıl jasaýda 20,7%, farmatsevtıkada, hımııa ónerkásibinde, metallýrgııa óndirisinde, onyń ishinde tústi metall óndirisinde, jeńil ónerkásipte, sonyń arasynda kıim óndirisinde, tamaq ónerkásibiniń óndirisinde ósimniń oń úrdisi baıqalady», - dedi Úkimet basshysy.
Sonymen qatar A. Mamın bıylǵy jyly 1 sáýirde OPEK+ 15 mınıstrlik kezdesýi ótkenin, Qazaqstan úshin onda munaıdy óndirýdi taǵy táýligine 6 myń barrelge ulǵaıtýdy kózdeıtin jekelegen sharttar kelisilgenin atap ótti.
«Osyǵan oraı, jyl sońyna deıin munaı óndirý salasynda oń dınamıka qamtamasyz etiledi. Budan basqa, ósýdiń oń qarqyny elektr energııasyn óndirýde 4,4% paıyz jáne kómir óndirýde 1% paıyz deńgeıinde tirkelip otyr. Kómir óndirisinde ósý qarqyny saqtalyp otyr. Qyzmet kórsetý sektorynda aqparat jáne baılanys salasynda joǵary ósý qarqyny baıqalady», - dedi Premer-Mınıstr.
Onyń aıtýnysha, jalpy, shekteý sharalary qyzmet kórsetý sektorynyń damýyn tejeýde.
«Negizgi kapıtalǵa ınvestıtsııalardyń ósýi ken óndirýdi esepke almaǵanda 34 paıyzdy qurady. Jalpy, biz ekonomıkanyń negizgi salalaryndaǵy kórsetkishterdiń birtindep jaqsarý úrdisin kórip otyrmyz. Ekonomıkalyq belsendilikti arttyrýǵa qosymsha jaǵdaı jasaý úshin Úkimet bıznesti qoldaý boıynsha keshendi sharalardy iske asyrý arqyly jumysty jalǵastyratyn bolady», - dedi Asqar Mamın.
