Úkimet basshysynyń orynbasary qazaqstandyqtarǵa úndeý jasady
NUR-SULTAN. QazAqparat – QR Premer-Mınıstriniń orynbasary Eraly Toǵjanov qazaqstandyqtardy koronavırýsqa qarsy vaktsına alýǵa shaqyrdy, dep habarlaıdy QazAqparat tilshisi.
«Azamattardyń densaýlyǵy men ómirin saqtaý Úkimettiń basty mindetterdiń biri. Sondyqtan saqtyq is-sharalaryn ustanýǵa shaqyramyz. Vırýs eshqaıda ketken joq. Epıdemıologııalyq jaǵdaıdyń odan ary qalaı ózgeretindigi ózimizge, árqaısymyzǵa, ár azamattyń jaýapkershiligine tikeleı baılanysty ekendigin aıtqym keledi. Ókinishke oraı, biz kún saıyn koronavırýstyń saldarynan azamattarymyzdan aıyrylýdamyz. Ony da bilip otyrǵandaryńyz artyq bolmaıdy. Eger halyqtyń basym bóligi vaktsınatsııany ýaqytyly jasaǵan bolsa, onda bul jaǵdaılardyń aldyn alýǵa bolatyndyǵyna eshqandaı kúmán joq. Halqymyz: «Aýyryp em izdegenshe, aýyrmaıtyn jol izde» deıdi. Osy jolmen júrý kerektigin 1 jyldyń ishinde oryn alǵan jaıt dáledep otyr», - dedi Úkimet basshysynyń orynbasary Ortalyq kommýnıkatsııalar qyzmetindegi brıfıngte.
Onyń aıtýynsha, vaktsına indetten saqtanýdyń negizgi joly. Odan basqa ázirshe álemde eshqandaı jol joq.
«Sondyqtan osy vaktsınany alyp úlgermegen árbir azamat, qazaqstandyq tez arada vaktsına qabyldaýy kerek. Árqaısymyz qoǵam aldyndaǵy, otbasymyz ben kúndelikti aralasyp júrgen jaqyndarymyzdyń, áriptesterimizdiń, dostarymyzdyń aldyndaǵy azamattyq jaýapkershiligimizdi is júzinde kórsetetin ýaqyt jetti», - dedi Eraly Toǵjanov.
