Úkimet basshysynyń orynbasary Aqparat mınıstrligine qoǵamdyq pikirdi eskerýdi tapsyrdy
NUR-SULTAN. QazAqparat – QR Premer-Mınıstriniń orynbasary Eraly Toǵjanov QR Aqparat jáne qoǵamdyq damý mınıstrligine qatysty tapsyrmalardy málim etti, dep habarlaıdy QazAqparat tilshisi.
«2021 jylǵa arnalǵan basymdyqty baǵyttar bar. Bul baǵyttar mınıstrlik qyzmetinde atqarylatyn basty jumystar bolady. Birinshiden, Memleket basshysy «halyq únine qulaq asatyn memleket» tujyrymdamasyn ary qaraı júzege asyrý boıynsha naqty mindetti júktedi», - dedi E. Toǵjanov atalǵan mınıstrliktiń keńeıtilgen alqa májilisinde.
Onyń sózine qaraǵanda, bul baǵytta qoǵamdyq baqylaý týraly zań jobasyn ázirleý mańyzdy qadam retinde belgilendi.
«Bul másele boıynsha qazirgi kezde tyńǵylyqty jumystar júrip jatyr. Mınıstrlik qoǵammen tyǵyz baılanysta jumys istep, osy baǵytta usynylǵan pikirlerdi eskerý kerek. Bul mańyzdy joba boıynsha sizdermen, sondaı-aq depýtattyq korpýspen birlese jumys isteımiz. Birqatar másele boıynsha talqylaý júrip jatyr, sondyqtan mınıstrlik osyǵan erekshe nazar aýdarýy tıis», - dedi Eraly Toǵjanov.
