Úkimet basshysyna Almatydaǵy oqıǵa týraly baıan etildi
ASTANA. 2 mamyr. QazAqparat - Tótenshe jaǵdaılar mınıstri Vladımır Bojko men Almaty ákimi Ahmetjan Esimov Úkimet basshysy Kárim Másimovke Almatydaǵy oqıǵalar týraly baıan etti.
«Mınıstr V.Bojko men ákim A.Esimov Almatydaǵy jaǵdaı týraly baıan etti», - dep jazdy K.Másimov Twitter-degi mıkroblogyna.
Esterińizge sala keteıik, Almatyda «Tastaq» yqshamaýdanynda resmı aldyn ala eskertýsiz, ekskavatormen turǵyn úılerdiń biri jıhazymen qosa súrip tastalǵan. Jeke sektordyń jeri kópqabatty turǵyn úıdiń qurylysyna berilgen bolyp shyqty.
Sottyń sheshimimen úıi jermen-jeksen etilgen Raısa Tsoı búgin túnde aýrýhanaǵa qaıtys boldy. Oryn alǵan oqıǵanyń saldarynan ol júrek talmasyna ushyrap, aýrýhanaǵa túsken bolatyn. R.Tsoıdyń úıi birinshi bolyp súrip tastalǵan. Bir sáttiń ishinde ol barlyq dúnıe-múlkinen aıyrylyp qaldy. Oqıǵanyń oǵan qatty aýyr tıgeni sonshalyq, júregi syr bergen.
Derek kózdiń aqparaty boıynsha, úıi súrip tastalǵan taǵy bir azamat kóz jumǵan. Demikpemen aýyratyn zeınetker, oqıǵa saldarynan jaǵdaıy kúrt nasharlap, keshirek qaıtys bolǵan.
Úkimet basshysy Kárim Másimov osy oqıǵaǵa oraı Almaty ákimine tapsyrma bergenin QazAqparat buǵan deıin habarlaǵan bolatyn.
«Úılerdi súrýge baılanysty aıtarym. Almaty ákimine máseleniń mán-jaıyn anyqtap, maǵan esep berý týraly tapsyrma beremin», - dep jazǵan edi K.Másimov Twitter-degi mıkroblogynda.
