Úkimet basshysyn tańdaýda Elbasy taǵy da kóregendik tanytty - Sh. Myrzahmetov
ASTANA. 24 qyrkúıek. QazAqparat - Úkimet basshysyn tańdaýda Elbasy taǵy da kóregendik tanytty. Búgin QR Parlamenti Májilisinde Memleket basshysy N. Nazarbaev premer-mınıstr kandıdatýrasyna Serik Ahmetovty usynyp, ony tómengi palata depýtattary biraýyzdan qoldaǵan bolatyn.
Osyǵan oraı QazAqparat tilshisine pikirin bildirgen depýtat Shalataı Myrzahmetov osylaı málim etti.
«Men S. Ahmetovty burynnan bilemin. Óziniń iskerligi arqasynda qaı jerde otyrmasyn ornyn tapqan azamat retinde kórsetip keldi. Kez-kelgen máseleni baıyptylyqpen taldap sheshetinin kórsetip júr. Qarapaıymdylyǵymen, kez-kelgen iske belsendi kirisetindigimen de erekshelenedi. Sondyqtan da, Elbasy durys tańdaý jasap, taǵy da kóregendigin tanytty dep bilemin», - dedi Shalataı Myrzahmetov.
Depýtattyń aıtýynsha, jıyn barysynda Memleket basshysy N. Nazarbaev burynǵy Úkimettiń asa qıyn ýaqytta jumys istegenin, júktelgen tapsyrmalardy joǵary deńgeıde oryndaǵanyna toqtalǵan. «Meniń oıymsha, Prezıdent Úkimettiń burynǵy jumys qarqynyn odan saıyn údetý úshin osyndaı tańdaý jasady. Óıtkeni, S. Ahmetov buǵan deıin de Premerdiń birinshi orynbasary qyzmetinde ysylǵan azamat», - dedi depýtat.
Esterińizge sala keteıik, Memleket basshysy Nursultan Nazarbaev búgin Qazaqstan Respýblıkasy Parlamenti Májilisiniń otyrysyna qatysyp, onda Elbasy Kárim Másimovke atqarǵan jumysy úshin alǵys bildirdi jáne Qazaqstan Respýblıkasy Premer-Mınıstri qyzmetine Serik Ahmetovtiń kandıdatýrasyn usyndy. Parlament Májilisiniń depýtattary Qazaqstan Respýblıkasy Premer-Mınıstri qyzmetine Serik Ahmetovtiń kandıdatýrasyn qoldaý týraly biraýyzdan sheshim qabyldady.
