Úkimet basshysy jumyspen qamtýǵa baǵyttalǵan qarjyny ýaqtyly bólýdi tapsyrdy

NUR-SULTAN. QazAqparat – Premer-Mınıstr Asqar Mamın salalyq mınıstrlikterge Jumyspen qamtý jol kartasy arqyly iske asatyn sharalardyń tıimdiligin baǵalaý jónindegi ólshemsharttardy ázirleýdi tapsyrdy, dep habarlaıdy QazAqparat tilshisi.

«Agroónerkásiptik keshenniń ınvestıtsııalyq jobalaryn qarjylandyrýǵa «Báıterek» holdıngi arqyly 100 mlrd teńge jiberý josparlanyp otyr.

Jalpy, Jumyspen qamtý jol kartasyn iske asyrýǵa aǵymdaǵy jyly 300 mlrd teńge bólindi. Sondaı-aq, 35,6 myń jumys orny, onyń ishinde 20 myńnan astam turaqty jumys oryndaryn qurý josparlanǵan, - dedi ol Úkimet otyrysynda.

Sondaı-aq, Asqar Mamın Eńbek jáne halyqty áleýmettik qorǵaý, Aýyl sharýashylyǵy mınıstrlikterine, óńir ákimderine, «Báıterek» holdıngine Atameken palatasymen birlesip, Jumyspen qamtýdyń jol kartasynyń barlyq baǵyttaryn sapaly iske asyryp, ýaqtyly qarjylandyrýdy tapsyrdy.

«Aýyl sharýashylyǵy men eńbek mınıstrlikteri aýyl sharýashylyǵy jobalaryn qarjylandyrý boıynsha is-sharalardyń tıimdiligin baǵalaý jónindegi ólshemsharttardy ázirlesin. Turaqty jumys oryndaryn qurý máselesin erekshe baqylaýda ustaý kerek», - dedi Úkimet basshysy.