Úkimet basshysy jetekshilik etetin ınvestıtsııalyq klımatty jaqsartý jónindegi úılestirý keńesi qurylady
ASTANA. QazAqparat - Elimizde ınvestıtsııalyq klımatty jaqsartýǵa baǵyttalǵan jumystardy úılestirý keńesi qurylady. Oǵan QR Premer-Mınıstri jetekshilik etedi. Bul týraly búgin Senattyń Qarjy jáne bıýdjet komıtetinde depýtattarmen kezdesýinde Investıtsııalar jáne damý mınıstri Áset Isekeshev málim etti.
Mınıstrdiń aıtýynsha, qazirgi ýaqytta Ekonomıkalyq yntymaqtastyq jáne damý uıymy elderiniń standarttary boıynsha ınvestıtsııalyq klımatty jetildirý sharalaryn belsendirý júrgizilýde. «Máselen, salyqtyq jáne sottyq ákimshilendirýdi jaqsartýǵa baǵyttalǵan tııanaqty jospar ázirlendi. Kóshi-qon máseleleri jeńildetildi, ákimshilik kedergiler tómendetildi. Biz 2017 jyly EYDU músheligine ótip, atalmysh Uıymnyń ınvestıtsııalar jónindegi komıtetiniń qatysýshysy bolǵymyz keledi», - dedi Á. Isekeshev.
Onyń aıtýyna qaraǵanda, Memleket basshysynyń joldaýda júktegen tapsyrmasyna sáıkes, ınvestıtsııa tartý jáne basqarý júıesi ózgeretin bolady.
«Úkimet deńgeıinde Premer-Mınıstr jetekshilik etetin arnaıy keńes qurylady. Ol keńes ınvestıtsııalyq klımat boıynsha jumystardy úılestirip, iri ári áıgili transulttyq kompanııalardy tartý máselesimen aınalysatyn bolady. Keńes quramynda birqatar iri halyqaralyq bankterdiń sarapshylary, transulttyq kompanııalarmen jaqsy baılanystaǵy sarapshylar tartylady», - dedi mınıstr.
