Úkimet basshysy jerge qatysty barlyq máselelerdi bir jyldyń ishinde retteýdi tapsyrdy
ASTANA. Qańtardyń 20-sy. QazAqparat /Ernur Aqanbaı/ - Premer-Mınıstr Kárim Másimov Jer resýrstaryn basqarý agenttigine 2010 jyldyń ishinde jer qatynastary máselelerin túbegeıli retteýdi tapsyrdy. Ol bul tapsyrmany atalmysh Agenttiktiń búgingi keńeıtilgen alqa májilisinde berdi,
dep habarlaıdy QazAqparat.
Premer-Mınıstrdiń aıtýynsha, endi bir jyldan keıin elimizde jer qatynastary salasyndaǵy qordalanyp qalǵan eshqandaı másele bolmaýy tıis. Úkimette olardy retteý jóninde erejelerge, zańnamalyq máseleler boıynsha aıqyn ustanym bolýy tıis. «Sońǵy 2-3 jyldaǵy daǵdarystyq qubylystar jer jónindegi máselelerdiń rettelýine tynyǵýǵa mursat berdi. 2005-2007 jyldardy eske alatyn bolsaq, jerge qatysty tańerteń bir baǵa bolsa, keshke baǵa eki esege qymbattady. Bul qazir basyldy. Zamanynda eki jep bıge shyqqandar, qazir ne isterlerin bilmeı, dal bolyp otyr. Sebebi, bunyń bári toqtap qaldy. Alaıda bul kópke sozylmaıdy. Bir jyl, múmkin eki jyl osylaı turar. Sondyqtan bizge jer qatynastaryna qatysty barlyq dúnıelerge, erejelerge, ustanymdarǵa túbegeıli núkte qoıý kerek. Sebebi, endi eki-úsh jylda jerge qatysty is-qımyldar qaıtadan jandana bastaıdy. Ol kezde burynǵy problemalar qaıta týyndaýy múmkin», dedi Úkimet basshysy.
Premer-Mınıstrdiń pikirinshe, qazir jer qatynastaryna qatysty máselelerdi retteıtin «altyn ýaqyt». «Jerge degen qyzyǵýshylyq qazir azdap báseńsidi. Onyń quny da qazir basqasha. Úsh jyl buryn Almaty men Astana qalalarynyń tóńireginde jer jaǵdaıy qalaı bolǵanyn bilemiz, jerdiń tóńireginde úlken aqshalar aınalysta boldy» degen Úkimet basshysy, sol kezdegi problemalar jer qatynastary máselesindegi erejelerdiń túgelge derlik rettelmeýinen týyndaǵanyn atap kórsetti.
