Úkimet basshysy jeńildetilgen nesıe berý isin jetildirýdi tapsyrdy
NUR-SULTAN. QazAqparat – Premer-mınıstr Asqar Mamın qarapaıym zattar ekonomıkasyn damytý boıynsha jeńildetilgen nesıe berý baǵdarlamasy sheńberinde óńirlerge belsendi jumys júrgizýdi júktedi, dep habarlaıdy QazAqparat tilshisi.
«Baǵdarlamany júzege asyrý, memlekettik satyp alý jáne jergilikti qamtý máseleleri 24 qańtarda Memleket basshysynyń tóraǵalyǵymen ótetin Úkimettiń keńeıtilgen otyrysynda qaralady. Іshki naryqty otandyq taýarlarmen barynsha molyqtyrý úshin qarqyndy jumys istep, jergilikti óndirýshilerdiń turaqty damýyn qamtamasyz etý qajet. Búgin de nesıe berilgen jobalardyń somasy 206 mlrd teńgeni quraıdy. Ekinshi deńgeıli bankterdiń qaraýynda 212 mlrd teńgeniń jobalary bar. Óńirler osy baǵdarlama sheńberinde belsendi jumys júrgizý kerek dep sanaımyn», - dedi Asqar Mamın Úkimet otyrysynda.
Onyń aıtýynsha, áleýetti kásipkerlerdi qoldaý kerek.
«Búgingi tańda maquldanǵan jobalar boıynsha eń jaqsy kórsetkishter Batys Qazaqstan, Túrkistan, Shyǵys Qazaqstan oblystarynda ekenin atap ótkim keledi. Sonymen qatar, artta qalǵan óńirler de bar. Olar: Nur-Sultan men Almaty qalalary, Atyraý men Qostanaı oblystary. Sondyqtan, artta qalǵan óńirler osy baǵyttaǵy jumys qarqynyn arttyrý kerek. Jeńildetilgen nesıe berý baǵdarlamasynyń qarqynyn jedeldetý qajet», - dedi ol.
