Úkimet basshysy jeke turǵyn úı qurylysy boıynsha ruqsat berý qujattaryn alýdy barynsha jeńildetýdi tapsyrdy
TANA. 28 qarasha. QazAqparat /Rýslan Ǵabbasov/ - Úkimet basshysy jeke turǵyn úı qurylysy boıynsha ruqsat berý qujattaryn alýdy barynsha jeńildetýdi tapsyrdy. Bul jaıynda Premer-Mınıstr Kárim Másimov búgin Úkimet otyrysynda aıtty.
«Dúnıejúzilik banktiń sońǵy «Doing Business» reıtıngisinde qurylysqa qujat berý boıynsha biz ókinishke qaraı tizimniń sońyna qaraı turaqtadyq», - dedi K.Másimov qurylys isteri jáne turǵyn úı-kommýnaldyq sharýashylyq agenttigi ókilderine qaratyp aıtqan sózinde. «Osyǵan baılanysty Agenttikke úzdik halyqaralyq tájirıbeni zerdelep, qurylys salýǵa ruqsat berý qujattaryn alýdy barynsha jeńildetý mindetin júkteımin. Birinshi kezekte bul másele jeke turǵyn úı qurylysyna baılanysty», - dep qadap aıtty Premer-Mınıstr.
Bul turǵyda Úkimet basshysy ınfraqurylymdy damytýda memlekette de, adamdarda da qarjy bar ekenin jetkizdi. Sonymen qatar ol halyqta jeke turǵyn úı salý nıeti joǵary ekenin aıtyp ótti. «Endi Agenttiktiń mindeti - bul baǵyttaǵy sharalardy barynsha jeńildetý», - dedi Premer-Mınıstr. «Keıde qaǵazbastylyqtyń saldarynan barlyq kabınetterden ótkenshe qurylys salǵyń kelmeı qalady», - dep synǵa aldy K.Másimov.
