Úkimet basshysy jastarmen kezdesýde qyzmet kórsetý salalaryna kásibı maman qajettiligin atap ótti
ASTANA. QazAqparat - Qostanaı oblysyna jumys sapary aıasynda QR Premer-Mınıstri jastar uıymdarynyń kóshbasshylarymen, TjáneKB jáne óńirdiń stýdentterimen kezdesip, olarmen básekege qabilettilikti arttyrý jáne elimizde zamanaýı bilim berý júıesin qurý máselelerin talqylady, dep habarlaıdy primeminister.kz .
Baqytjan Saǵyntaev quzyrettilik jańa ekonomıkany qalyptastyrýdyń basty faktoryna aınalatynyn, sol sebepti kásibı mamandar bazalyq salalardy damytý, sonymen qatar elimizde belsendi damyp kele jatqan qyzmet kórsetý salalaryna da qajet ekenin atap ótti. Memleket kásiptik bilim berý salasyna keshendi qoldaý kórsetip keledi.
Aǵymdaǵy jyly «Barshaǵa arnalǵan tegin kásiptik-tehnıkalyq bilim berý» jobasy iske qosylady. Sonymen qatar, Úkimet ónimdi jumyspen qamtý jáne jappaı kásipkerlik, jastar is-tájirıbesi, «Serpin» jáne basqa baǵdarlamalar arqyly barlyq oqýǵa nıetti adamdarǵa keńinen qoldaý kórsetip keledi. Jumys berýshilerdiń talaptary men jastardyń suranystaryna jaýap beretin mamandyq alýdyń ıkemdi júıesi qalyptastyrylýda.
Kezdesý aıasynda «Balalar men jastar uıymdary qaýymdastyǵy» ZTB tóraıymy T.Antonınova «Qazaqstannyń úshinshi jańǵyrýy: jahandyq básekege qabilettilik» Joldaýy boıynsha aqparattyq-túsindirý jumysy týraly aıtty, avtomobıl kóligi kolledjiniń stýdenti V.Kýcherenko WorldSkills jumysshy mamandyqtar boıynsha chempıonatyna qatysatyndyǵyn málimdedi, jastar kóshbasshysy M.Muhtarova múmkindigi shekteýli jandarǵa qoldaý kórsetý taqyrybynda baıandama jasady, Qostanaı memlekettik pedagogıkalyq ınstıtýtynyń stýdenti A.Gaaze EKSPO-2017 aıasyndaǵy eriktiler jumysy máselelerine toqtaldy, Qostanaı qurylys kolledjiniń stýdenti V.Pınaeva tehnıkalyq bilim berý múmkindikterin qalaı paıdalanýǵa bolatyndyǵymen bólisti, Qostanaı qurylys kolledjiniń stýdenti D.Imanov kóptildilik boıynsha baǵdarlamany júzege asyrý týraly aıtty.
Mamandardy oqytýda jańa tásilderdiń qoldanylýynyń jáne «Barshaǵa arnalǵan tegin kásiptik-tehnıkalyq bilim berý» baǵdarlamasynyń júzege asyrylý barysynyń mysaly retinde Baqytjan Saǵyntaevqa Qostanaı avtomobıl kóligi kolledjiniń qyzmeti tanystyryldy.
QR Premer-Mınıstrine tegin kásiptik-tehnıkalyq bilim berý aıasynda kolledj bıyl 315 adamdy oqýǵa qabyldaıtyny týraly aıtyldy, onyń ishinde 100 adam Ónimdi jumyspen qamtý jáne jappaı kásipkerlikti damytý baǵdarlamasy aıasynda qabyldanady. Kásiptik daıarlaý 7 mamandyq jáne 10 biliktilik boıynsha júrgiziledi. Sonymen qatar, 2017 jyldyń 10 sáýirinen bastap kolledjde qysqa merzimdi kásiptik kýrstar bastalǵan, onda 4 mamandyq boıynsha 196 adam qamtylǵan.
Eske salaıyq, Memleket basshysynyń Qazaqstannyń úshinshi jańǵyrýy Joldaýynda adamzat kapıtalyn damytý ekonomıkalyq ósimniń jańa modelin qalyptastyrýda basymdyqtardyń biri retinde atalǵan. Osy jumys aıasynda Úkimet aldynda bilim berýdi onyń negizgi býynyna aınaldyrý mindeti tur. Osy maqsatta qazir qoljetimdi jáne sapaly bilim berýdi damytý boıynsha keshendi jumystar atqarylýda.
