Úkimet basshysy jańajyldyq mereke kúnderi halyqtyń qaýipsizdigine erekshe nazar aýdarýdy tapsyrdy

«Biz jańajyldyq merekelik sharalardyń qarsańyndamyz. Osy oraıda, demalys kúnderinde halyqtyń qaýipsizdigine erekshe nazar aýdarǵym keledi»,-dedi S. Ahmetov.

Budan bólek, Úkimet basshysy el halqyn jylýmen, gazben jáne sýmen úzdiksiz qamtamasyz etý máselesiniń aıyryqsha baqylaýda bolýyn atap ótti.

«Bıylǵy qys erekshe aıazdy bolýyn jalǵastyrýda. Ózderińiz bilesizder, sınoptıkterdiń boljamy boıynsha sońǵy 30 jylda osyndaı eki aptalyq aıazdy kúnder jalǵaspaǵan bolatyn. Degenmen de, qystyń qahary áli alda. Atap aıtqanda, qańtarda da saryshunaq aıazdar bolady dep kútilýde»,-dep jetkizdi Premer-Mınıstr.

Sondyqtan S. Ahmetov jergilikti jáne ortalyq deńgeıdegi tıisti qyzmetterdiń ózara is-qımylyna aıyryqsha nazar aýdarýdy júktedi. Osy oraıda ol qajet bolǵan jaǵdaıda eskertý júıesiniń jedel ári belsendi jumys isteýi kerektigin qadap aıtty.

Sonymen qatar Úkimet basshysy mereke kúnderi óńirlerde táýlik boıy kezekshilik uıymdastyrýdy júktedi.