Úkimet basshysy janarmaı baǵasyn ósirýge qatysty: Basqa jol joq

ASTANA. QazAqparat – Elimizde janar-jaǵarmaı naryǵyna qoldaý kórsetilip, ony elden zańsyz áketýdiń jolyn kesý úshin tıisti sharalar qabyldanady. Bul týraly Premer-Mınıstr Álıhan Smaıylov málim etti, dep habarlaıdy QazAqparat tilshisi.

«Janar-jaǵarmaı naryǵyndaǵy jaǵdaıdy turaqtandyrý úshin baǵa aıyrmashylyǵyn tómendetý kerek. Bul elden munaı ónimderiniń jappaı shyǵarylýyn azaıtýǵa jáne ishki naryqty qamtamasyz etýge múmkindik beredi. Bizde budan basqa jol joq. Degenmen aýyl sharýashylyǵy taýaryn óndirýshilerge arzandatylǵan dızel tolyǵymen bólindi. Olarǵa baǵa 204 teńge kúıinde qala bermek», - dedi Álıhan Smaıylov Úkimet otyrysynan keıin BAQ ókilderi aldynda málimdeme jasaı turyp.

«Naýryz aıynyń ózinde janar-jaǵarmaı tutyný kólemi ótken jylmen salystyrǵanda 15%-ǵa ósken. Eger respýblıka baǵa aıyrmashylyǵyn qysqartpasa, onda bıyl 850 myń tonnaǵa deıin kólemde janarmaı tapshylyǵyna urynamyz. Sonymen qatar janarmaı óndirýde ishki naryqty qoldaý jáne elden zańsyz áketýdiń jolyn kesý úshin tıisti sharalardy qabyldaımyz», — dep tolyqtyrdy Úkimet basshysy.