Úkimet basshysy janar-jaǵarmaı baǵasynyń turaqty bolatynyna senimdi
STANA, Shildeniń 27-si. QazAqparat /Marlan Jıembaı/ - Búgin Úkimet otyrysynan keıin BAQ ókilderine suhbat bergen Premer-Mınıstr Kárim Másimov naryqtaǵy janar-jaǵarmaı baǵasynyń rettelýine kóńili tolatyndyǵyn atap ótti.
Bul rette ol egistik alqaptarynyń jumysy jandanatyn kóktem jáne kúz aılarynda buǵan deıin janar-jaǵarmaı baǵasynyń kúrt ósip ketetindigin aıta kele, ótken jyldyń qarashasynda Elbasynyń naqty tapsyrmasynan keıin ǵana onyń turaqtanǵanyn tilge tıek etti. Sondaı-aq Úkimet basshysy sol aralyqta elimizde janar-jaǵarmaı eksportyna shekteý engizilgenin de eske saldy. Bul oraıda Premer-Mınıstr elimizdiń Kedendik odaq aıasyna enýine baılanysty bul shekteýdi odan ári paıdalana almaıtyndyǵyn atap ótti.
«Árıne Kedendik odaqqa qatysty máseleler bar. Óıtkeni Reseı Federatsııasy naryǵyndaǵy janar-jaǵarmaı baǵasy Qazaqstanǵa qaraǵanda joǵary. Eger Kedendik odaq jumysyn bastar aldynda biz Qazaqstan aýmaǵynan janar-jaǵarmaı eksportyna shekteý qoısaq, endi bul tetikti odan ári paıdalana almaımyz. Sondyqtan biz qazir Reseıdiń Qazaqstan tájirıbesin zerdeleýi úshin konsýltatsııalar ótkizip, saıasatty kelisýdemiz. Bul máseleni «qolmen basqarý rejiminde» sheshý qajet, degenmen biz baǵanyń turaqty bolatyndyǵyna ýáde beremiz jáne de solaı bolady da», dedi ol.
