Úkimet basshysy jańadan taǵaıyndalǵan orynbasarlaryna alǵashqy tapsyrmasyn berdi
ASTANA. 24 qańtar. QazAqparat /Rýslan Ǵabbasov/ - Premer-Mınıstr Kárim Másimov jańadan taǵaıyndalǵan orynbasarlaryna atqaratyn qyzmetterin bólip berdi.
Bul jaıynda búgin Úkimet otyrysynda málim boldy.
«Úkimette jáne barsha memlekettik organdarda taǵaıyndaýlar aıaqtaldy. Kadrlyq máseleler sheshildi. Endi Elbasy júktegen tapsyrmalardy oryndaý qajet», - dedi K. Másimov.
Úkimet basshysy jańadan taǵaıyndalǵan orynbasarlarynyń qyzmetterine toqtalyp ótti. Atap aıtqanda, Premer-Mınıstrdiń birinshi orynbasary Serik Ahmetov ekonomıka men óńirlik saıasat, údemeli ındýstrııalyq-ınnovatsııalyq damý baǵdarlamasyn júzege asyrý, ónerkásip, elektr energetıkasy, týrızm, altyn óndirý, tehnıkalyq retteý, qazaqstandyq qamtý memlekettik saıasatyn iske asyrý máselelerin qamtıdy. Sonymen qatar oǵan Agroónerkásiptik keshen, qorshaǵan orta, jer jáne sý resýrstary, ǵarysh qyzmeti, qurylys, turǵyn úı kommýnaldyq sharýashylyǵy, kólik jáne logıstıka ınfraqurylymyn damytý, tótenshe jaǵdaılar máseleleri júktelip otyr.
Qaırat Kelimbetovke makroekonomıkalyq, bıýdjettik saıasat, memlekettik aktıvterdi basqarý, qarjylyq sektor, salyq jáne keden saıasaty, memlekettik - jeke menshik áriptestikti damytý, tabıǵı monopolııalardy retteý máseleleri, básekelestikti damytý, saýda jáne tarıf saıasaty baǵytyndaǵy jumystar tapsyryldy. Munymen qosa onyń qaraýynda Qazaqstannyń Dúnıejúzilik saýda uıymyna enýi, Eýrazııalyq ekonomıkalyq qaýymdastyǵy, Kedendik odaq, Biryńǵaı ekonomıkalyq keńistik aıasyndaǵy yntymaqtastyq jaıy bolady.
Al, Erbol Orynbaevqa bilim, ǵylym, densaýlyq saqtaý, áleýmettik saıasat, týrızm, sport, sondaı-aq shaǵyn jáne orta bıznes, ákimshilik reformany iske asyrý máseleleri, ákimshilik kedergilerdi azaıtý, salyq jáne kedendik ákimshileý sharalary júkteldi. Sonymen qatar ol bıznes salasyndaǵy ındıkatorlardy jaqsartý, «Bıznestiń jol kartasy - 2020» baǵdarlamasy men «Eńbekpen qamtý - 2020» baǵdarlamasyn úılestiredi.
Esterińize sala keteıik, jaqynda 5-shi saılanǵan Májilistiń birinshi sessııasynda depýtattar Úkimetke senim bildirgen bolatyn. Sonymen qatar Elbasynyń Jarlyǵyna sáıkes Úkimette birqatar taǵaıyndaýlar boldy. Osynyń aıasynda birqatar taǵaıyndaýlar júzege asyryldy.
