Úkimet basshysy jańa sporttyq keshenniń ashylýyna qatysty
ASTANA. Shildeniń 2-si. QazAqparat /Rýslan Ǵabbasov/ - Búgin Astanada Úkimet basshysy Kárim Másimovtyń qatysýymen Tótenshe jaǵdaılar mınıstrliginiń jańa sporttyq kesheniniń ashylý rásimi ótti.
Atalǵan mınıstrlik qyzmetkerleriniń sporttyq jetistiktetin damytýǵa arnalǵan mańyzdy nysan elorda kúni qarsańynda iske qosylyp otyrǵanyna toqtalǵan Premer-Mınıstr, «tótenshe jaǵdaılar qyzmetkerleriniń sporttyq daıarlyǵy men biliktiligin jetildirý basty sharalardyń qatarynda. Osy turǵyda elimizdiń azamattary óz ómirleriniń qaýipsizdigi úshin senimdi bola alady. Sebebi, apatty jaǵdaılarda sizderdiń biliktilikterińizdiń arqasynda memleket kómekke kelip, adam ómirleri qutqarylady, sondaı-aq osy jumystardy sizder jyldam ári ýaqytyly atqara alasyzdar»,-dedi.
«Sizderge búgin syılyq jasalyp otyr, osyǵan baılanysty úzdik jetistikter men jedel jumystar arqyly bizdiń halqymyzǵa tıisinshe qyzmet kórsetýlerińiz qajet»,-dep atap ótti K.Másimov.
Aıta keteıik, bul sporttyq keshen elordadaǵy №5 mamandandyrylǵan órt sóndirý bóliminiń aýmaǵynda ornalasqan. Keshende oqý-jattyǵý munarasy, basseın, jaýyngerlik jáne jattyǵý zaldary, fýtbol, voleıbol alańdary men tennıs zaly, sondaı-aq órt sóndirýshiler men qutqarýshylar qyzmetine qajetti basqa da quraldar men jabdyqtar jasaqtalǵan. Qurylys alańy 2,5 gektar aýmaqty alyp jatyr. Sport kesheniniń qurylysyna 700 mıllıon teńgeden astam qarjy bólindi.
«Tótenshe jaǵdaılar mınıstrliginde órtten qorǵaý sporty boıynsha jyl saıyn qysqy jáne jazǵy chempıonattar ótkizilip keledi. Jarysta úzdik dep tanylǵan qyzmetkerler mınıstrliktiń qurama komandasyna iriktelinedi. Atap aıtqanda, bul sportshylar osy sport túri boıynsha halyqaralyq saıystarda elimizdiń namysyn qorǵaýǵa qatysady»,-deıdi tótenshe jaǵdaılar qyzmetkerleri.
