Úkimet basshysy jańa mınıstrdiń jumysty odan ári jandandyratyna senim bildirdi
ASTANA. 25 qyrkúıek. QazAqparat - Búgin Ekonomıkalyq damý jáne saýda mınıstrliginde bolyp, onda ujymǵa vedomstvonyń jańa basshysy Erbolat Dosaevty tanystyrý barysynda QR Premer-Mınıstri Serik Ahmetov vedomstvo jumysynyń odan saıyn jandanatynyna senim bildirdi.
Tanystyrý barysynda Úkimet basshysy búgin Elbasynyń jarlyǵymen Erbolat Dosaev mınıstr retinde taǵaıyndalǵanyn, sosyn onyń ár jyldary laýazymdy qyzmetter atqarǵanyn atap ótti.
«Men mınıstrliktiń aldyna júktelgen mindetterdi tabysty júzege asyrý úshin barlyq kúsh-jigerińiz ben bilimińizdi salyp qyzmet etedi dep senemin. Onyń ústine eldiń makroekonomıkasymen, strategııalyq damý máselelerimen aınalysyp, bizdiń elimizdegi barlyq derlik damý baǵdarlamalaryna saraptama jasaıtyn Ekonomıkalyq damý jáne saýda mınıstrliginiń aldyna júktelgen mindetter de aýqymdy. Men siz basshylyq jasaıtyn mınıstrlik shyn máninde Qazaqstan Úkimetindegi ortalyq býynǵa aınalýy tıis dep oılaımyn», - dep atap ótti ujymǵa tanystyrý barysynda Úkimet basshysy Serik Ahmetov
Esterińizge sala keteıik, búgin Memleket basshysy Nursultan Nazarbaevtyń Jarlyǵymen Úkimettiń jańa quramy jasaqtalǵan bolatyn. Soǵan oraı mınıstrlerdiń basym bóligi óz laýazymdaryn saqtap qalǵan edi. Al Ekonomıkalyq damý jáne saýda mınıstrligine jańa basshy taǵaıyndaldy. Vedomstvonyń burynǵy basshysy Baqytjan Saǵyntaev «Nur Otan» HDP Tóraǵasynyń birinshi orynbasary qyzmetine aýysqan edi.
Toqtala ketetin jaıt, jarııalanǵan Memleket basshysynyń Jarlyǵyna sáıkes, jańa Úkimettiń quramynda eki mınıstrlik basshysy áli taǵaıyndalmaǵan. Atap aıtqanda, Syrtqy ister mınıstri men eńbek jáne halyqty áleýmettik qorǵaý mınıstrlerin taǵaıyndaý keıinirek sheshiletin bolady.
