Úkimet basshysy jaqynda iske qosylatyn tsıfrlyq jobalardy aıtty

NUR-SULTAN. QazAqparat – Qoldanbaly ǵylymı zertteýlerdi qarjylandyrýda jeke sektordyń úlesi keminde 50 paıyzǵa artady. Bul týraly Úkimet otyrysynda tehnologııalyq serpilis ulttyq jobasyn talqylaý kezinde Premer-Mınıstr Álıhan Smaılov aıtty, dep habarlaıdy QazAqparat tilshisi.

«Tsıfrlandyrý, ǵylym jáne ınnovatsııalar esebinen tehnologııalyq serpilis» atty ulttyq jobadaǵy baǵyttardy iske asyrý IT-saladaǵy Jalpy ishki ónimniń úlesin 5 paıyzǵa deıin ulǵaıtyp, qoldanbaly ǵylymı zertteýlerdi qarjylandyrýda jeke sektordyń úlesin keminde 50 paıyzǵa arttyrýy tıis. Ulttyq jobada óndiristik sektordy, ǵylymdy jáne áleýmettik salany tsıfrlandyrýdyń birqatar negizgi mindeti belgilengen. Máselen, azamattarymyzǵa áleýmettik qoldaý alýdy jeńildetýge múmkindik beretin jobalar pýly iske asyrylyp jatyr. Jaqynda pılottyq negizde iske qosylǵan «Otbasynyń tsıfrlyq kartasy» jobasy osy tásilderdiń biri bolyp otyr», - dedi Á. Smaılov.

Onyń aıtýynsha, bul joba ataýly áleýmettik kómek alýǵa muqtajdyq bolýy múmkin 480 myńnan astam otbasyn jáne zeınetaqy tólemderi men járdemaqy alyp otyrǵan 100 myńǵa jýyq azamatty qamtýǵa múmkindik berdi. Jobany bıylǵy jyldyń sońyna deıin paıdalanýǵa berý josparlanyp otyr.

«Jyl sońyna deıin «Áleýmettik ámııan» júıesin iske qosý josparlanǵan. Jer qoınaýyn paıdalaný salasynyń tartymdylyǵyn arttyrý maqsatynda «Kaznedra» platformasyn engizý josparlanyp otyr. Bul ınvestorlarǵa naqty ýaqyt rejıminde mıneraldyq resýrstardyń derekter bankine erkin qol jetkizýge múmkindik beredi», - dedi Úkimet basshysy.

Foto:primeminister.kz