Úkimet basshysy Jaqsylyq Úshkempirovtiń otbasyna kóńil aıtty
NUR-SULTAN. QazAqparat - Qazaqstan Respýblıkasynyń Premer-Mınıstri Asqar Mamın dańqty sportshy, Olımpıada chempıony, Qazaqstannyń Eńbek Eri Jaqsylyq Úshkempirovtiń qaıtys bolýyna baılanysty týǵan-týystary men jaqyndaryna kóńil aıtý jedelhatyn joldady, dep habarlaıdy primeminister.kz.
«Grek-rım kúresi boıynsha qazaqtan shyqqan tuńǵysh Olımpıada chempıony, Qazaqstannyń Eńbek Eri, otandyq sporttyń jáne elimizdiń áleýmettik-ekonomıkalyq damýyna ólsheýsiz úles qosqan kórnekti tulǵa Jaqsylyq Ámiráliuly Úshkempirovtiń mezgilsiz qaıtys bolýyna baılanysty Sizderge orny tolmas aýyr qaıǵylaryńyzǵa ortaqtasyp kóńil aıtamyn.
Aty ańyzǵa aınalǵan Jaqsylyq Ámiráliuly kásipqoı qazaq kúresin nyǵaıtýmen birge, isker basshy, bilikti uıymdastyrýshy retinde bar sanaly ǵumyryn aýyl sharýashylyǵyn nyǵaıtýǵa, kásipkerlik salasyn órkendetýge arnady. Jaqsylyq Ámiráliuly ózine tán adamgershilik qasıetteri men qaıyrymdylyq isteri arqyly árdaıym halqynyń syı-qurmetine bólendi.
Asyl azamattyń jarqyn beınesi álemdik sport tarıhyndaǵy óshpes ǵumyr joly men baǵyndyrǵan bıikteri, el ıgiligi jolyndaǵy eren eńbegi arqyly óskeleń urpaqtyń júreginde máńgi saqtalyp qalary sózsiz. Marqumnyń topyraǵy torqa, jany jánnatta bolsyn!» delingen jedelhatta.
Eske sala keteıik, búgin Olımpıada chempıony, Qazaqstannyń Eńbek Eri Jaqsylyq Úshkempirov dúnıeden ozdy.
Qazaǵa baılanysty Elbasy Jaqsylyq Úshkempirovtiń jaqyndaryna kóńil aıtty.
Sondaı-aq, Qazaqstan Prezıdenti Qasym-Jomart Toqaev Jaqsylyq Úshkempirovtiń elimizde sport salasynyń keń qanat jaıýyna atsalysyp, jastarǵa úlgi bolǵanyn atap ótti.
