Úkimet basshysy zeınetaqy qarjysyn jeke kompanııalardyń basqarýyna berý merzimin atady
ASTANA. QazAqparat - QR Úkimet basshysy Baqytjan Saǵyntaev zeınetaqy qarjysyn jeke kompanııalardyń basqarýyna berý merzimin atady. Bul jaıynda Premer-Mınıstrdiń depýtattyq saýalǵa bergen jaýabynda málim boldy, dep habarlaıdy QazAqparat.
«Atalǵan máseleni egjeı-tegjeıli pysyqtaý úshin jeke basqarýshy kompanııalardyń basqarýyna zeınetaqy aktıvterin berý boıynsha sharalardy oryndaý merzimi 2018 jyldyń sońyna deıin belgilendi»,-dep atap ótilgen saýalǵa berilgen jaýapta.
Úkimet basshysy QR Ulttyq banki jeke basqarýshy kompanııalarǵa zeınetaqy aktıvterin berý turǵysynda usynysty ázirlegenin eske salyp ótti. 2016 jáne 2017 jyldardyń barysynda bul usynystar Ekonomıkalyq saıasat jónindegi keńeste birneshe márte talqylandy, sondaı-aq qazirgi ýaqytta Qzaqstannyń qarjy uıymdarynyń qaýymdastyǵy alańynda bıznes-qoǵamdastyqpen talqylanýda.
Zeınetaqy aktıvterin ishki naryqtaǵy jeke basqarýshy kompanııalardyń basqarýyna berý rásimderin anyqtaýmen qatar, Ulttyq bank zeınetaqy aktıvteri bóliginde ındekstik ınvestıtsııalaý úshin sheteldik basqarýshylardy tartý boıynsha jumystardy júrgizýde.
«Qazirgi ýaqytta jahandyq aktsııalar men oblıgatsııalardyń mandattary boıynsha sheteldik basqarýshy kompanııalardyń syrtqy basqarýyna zeınetaqy aktıvterin berý jumystary júrgizilip jatyr. Ol kompanııalar -Qazaqstannyń Ulttyq qorynyń aktıvteri jáne Ulttyq banktiń altyn-valıýta aktıvteriniń syrtqy basqarýshylary. Sondaı-aq «Jahandyq belsendi aktsııalar» mandaty boıynsha jańa syrtqy basqarýshylardy tańdaý jumystary júrgizilýde», - delingen habarlamada.
Zeınetaqy aktıvterin syrtqy basqarýǵa berýdi aǵymdaǵy jyldyń sońyna deıin bastaý josparlanýda.
