Úkimet basshysy: Zaýyttardy qant qyzylshasyna kóshirýge ýaqyt kerek
ASTANA. QazAqparat - «Atameken» UKP tóralqasynyń keńeıtilgen otyrysynda QR Úkimet basshysy Baqytjan Saǵyntaev elimizdi qantpen qamtamasyz etý jaǵdaıyn túsindirdi, dep habarlaıdy QazAqparat.
Premer-Mınıstr búgingi kúnge deıin qant quraǵyn satyp alýdy doǵarý kerektigi jaıynda másele kóterilgenin, alaıda QR Úkimeti bul baǵytta qarsylyq tanytyp otyrǵanyn atap ótti. Sebebi elimizdegi zaýyttar birden tolyqtaı qant qyzylshasyn óńdeýge kóshýge daıyn emes.
«Bizdiń zaýyttardy jańǵyrtý kerek ekeni málim, ıaǵnı ondaǵy jabdyqtardy qant qyzylshasyn óńdeýge qaıtadan jańartý qajet. Bul óz kezeginde belgili bir ýaqytty talap etedi. Jaqynda Aqsý qant zaýaty iske qosyldy. Osy oraıda Jambyl jáne Almaty oblystarynda qant qyzylshasyn aýqymdy kólemde ósirýge betburys jasaldy. Aldymen biz shıkizat pen jabdyqtar boıynsha jumystar jasap, tek sodan keıin ǵana zaýyttarda qyzylshany óńdeýge kóshýge tıistimiz», - dedi.
Bul turǵyda B. Saǵyntaev josparly ýaqyttyń ishinde ónimmen tolyqtaı ózimizdi qamtamasyz ete alatynymyzdy atap ótti.
«Keıbir baǵyttar boıynsha merziminen buryn aýysatyn bolsaq, bizdiń naryqty sol reseılik taýarlardyń ózi basyp alý múmkin ekenin túsinýimiz kerek. Mundaı jaǵdaıda keıinnen eshkim de jańǵyrtýǵa nazar aýdarmaıtyn bolady, sebebi ónim ol kezde básekege qabilettilikten aıyrylady»,- dep túıindedi sózin Premer-Mınıstr.
Budan buryn habarlanǵandaı, bıyl egis alqaptaryn ártaraptandyrý elimizde qant óndirisin bir jarym esege arttyrýǵa múmkindik beretini aıtylǵan edi .
Aıta keteıik, jalpy Qazaqstanda qant qajettiligi 500 myń tonnany quraıdy. Qanttyń 90 paıyzy qant quraǵynan óndiriledi jáne ol nóldik bajben ımporttalady. Bul norma elimizde 2019 jylǵa deıin kúshinde bolady. Sáıkesinshe, qanttyń 10 paıyzy qyzylshadan óndiriledi. QR AShM ımporttalatyn shıkizat kólemin tómendetýdi josparlap otyr.
