Úkimet basshysy xalyqtyń táýekelshil minezin tyıyp otyrýǵa tapsyrma berdi
ASTANA. QazAqparat - Úkimettiń búgingi otyrysynda QR Premer-Mınıstri Baqytjan Saǵyntaev kóktemgi sý tasqyny kezinde xalyqtyń táýekelshil minezine jol bermeý kerektigin jetkizdi, dep xabarlaıdy QazAqparat tilshisi.
"Árıne, sý tasqyny bastalǵaly beri adamdardyń qaıtys bolǵany ókinishti. Iá, ondaı jaǵdaılarǵa san alýan sebepter túrtki boldy. Degenmen, biz eskertý jasadyq. Buǵan deıin talaı ret aqyldastyq. Soǵan qaramastan qazirgi sharalar jetkiliksiz dep oılaımyn. Eger bir jerde sý tasqyny qaýpi joǵary bolsa, esertýmen shektelmeı, birden baqylaý beketterin ornatyp, jol qozǵalysyn toqtatý qajet. Adamdar "Táýekel!" dep, jolǵa shyǵyp ketedi. Aman qalamyz dep oılaıdy. Adamnyń psıxologııasy sondaı. Jolǵa shyǵýǵa bolmaıdy, dalada qaýipti dep qatań aıtpaıynsha...Endi, biz apta saıyn jınalyp, osy máseleni talqylap otyramyz. Alaıda adam shyǵyny bar. Óte ókinishti...", - dep atap kórsetti Saǵyntaev.
Aıta keteıik, búgingi otyrysta QR Іshki ister mınıstri Qalmuxambet Qasymov kóktemgi sý tasqynyna baılanysty qazirgi jaǵdaı jaıynda baıandap, osy ýaqytqa deıin bes adamnyń sýǵa ketkenin jetkizdi.
