Úkimet basshysy: Vegetatsııalyq kezeńdi sýmen qamtý byltyrmen salystyrǵanda jaqsy
«Sý elimiz úshin árqashanda ózekti máselelerdiń biri sanalady. Sondyqtan bul másele boıynsha arnaıy jumys júrgizip jatyrmyz. Kórshiles eldermen tıisti komıssııalar, jumys toptary qurylǵan. EEAO, basqa da ekijaqty kezdesýler bolsyn, árqashan áriptesterimizben bul máseleni bólek talqylaımyz. Mysaly, bıyl Syrdarııa ózeni basseıni boıynsha tórt eldiń - Qazaqstan, Ózbekstan, Tájikstan jáne Qyrǵyzstan memleketteri arasyndaǵy kelisimge qol qoıdyq. Sonyń nátıjesinde biz Shardara sý qoımasyna 5 mlrd tekshe metr sý jınadyq. Kóktemde Kóksaraı sý qoımasyna 850 mln tekshe metr sýdy jınaı aldyq. Jyl basynda Kóksaraı sý qoımasy qurǵap ketken edi. Jalpy, byltyrmen salystyrǵanda osy eki sý qoımasyna 340 mln tekshe metr sýdy artyǵymen jınap otyrmyz. ıAǵnı, Syrdarııa ózeniniń jaǵdaıy bıyl byltyrmen salystyrǵanda jaqsy», - dedi Úkimet basshysy «Qazaqstan» ulttyq telearnasynyń «Jańa Qazaqstan» baǵdarlamasyna bergen suhbatynda.
Sonymen qatar Úkimet basshysy Shý jáne Talas ózenderine qatysty kórshi Qyrǵyzstan eliniń basshylarymen kelissózge qol qoıylyp, tıisti keste bekitilgenin atap ótti. Qazirgi ýaqytta otandyq aýyl sharýashylyǵy taýarlaryn óndirýshiler sýdy bekitilgen kestege saı alyp jatqanyn aıtty.
«Byltyrǵa qaraǵanda jaǵdaı jaman emes. Sonymen qatar Jaıyq ózeni boıynsha da ótken jylmen salystyrǵanda 430 mln tekshe metr sý kóp kelip otyr. Reseı tarapymen de tıisti kelisim jasadyq. Jalpy aıtqanda, vegetatsııalyq kezeńge baılanysty sýmen qamtamasyz etý byltyrmen salystyrǵanda jaqsy jáne bul másele erekshe nazarda», - dedi Álıhan Smaıylov.
Foto: stopress.ru
