Úkimet basshysy: Valıýta aıyrbastaý pýnktteri halyqty dúrliktirmeýi tıis
ASTANA. QazAqparat - Búgin Úkimettiń selektorlyq rejimdegi otyrysynda Premer-Mınıstr Serik Ahmetov óńirlerde teńgeniń AQSh dollaryna shaqqandaǵy baǵamyn baqylaý úshin jedel jumys toptaryn qurýdy tapsyrdy.
Otyrys barysynda óńir ákimderi keıbir valıýta aıyrbastaý pýnktterinde teńgeniń AQSh dollaryna shaqqandaǵy baǵamynyń shekti deńgeıi joǵary ekenin aıtty.
«Bul másele barlyq ákimderge qatysty, ıaǵnı óńirlerde Ulttyq banktiń fılıaldarymen birlese jedel jumys toptaryn qurý kerek. Bir-eki kúnde bul jaǵdaı bir izge túsedi. Alaıda, Ulttyq banktiń qaýlysy oryndalýy úshin valıýta aıyrbastaý pýnkterinde bolyp jatqan úderisterge shuǵyl áreket etýi turǵysynda osyndaı jedel jumys toptary qajet», - dedi Úkimet basshysy. Osy oraıda S. Ahmetov eń bastysy - valıýta aıyrbastaý pýnktteri halyqty dúrliktirmeýi tıis ekenin qadap aıtty.
«Ulttyq banktiń sheshimi shyǵaryldy, valıýta bar, aıyrbastaý pýnktteri turaqty jumys istep tur. Bizdiń maqsat - atqarý jumystaryn jergilikti jerlerge deıin jetkizý. Sondyqtan ákimder osy máselelerdi Ulttyq bank fılıaldarynyń basshylarymen óńirlerde erekshe baqylaýǵa alýy kerek», - dedi Premer-Mınıstr.
