Úkimet basshysy ýnıversıtette bilim alý qunyn tómendetý máselesin qadaǵalaıdy
ASTANA. QazAqparat - Búgin Úkimet otyrysynda Premer-Mınıstr Baqytjan Saǵyntaev oqý men dári-dármek qunyn tómendetý máselelerin jeke qadaǵalaýyna aldy, dep habarlaıdy QazAqparat.
«Bilim jáne ǵylym, Densaýlyq saqtaý mınıstrlikterine osy salalarda halyqty alańdatyp otyrǵan ózekti máselelerdi sheshý boıynsha mende jumys keńesin daıyndaýdy tapsyramyn. Negizgi ekpin - ol oqý qunyn, sondaı-aq medıtsınalyq qyzmetter, dári-dármektiń baǵasyn tómendetý. Merzimi eki apta», - dedi Premer-Mınıstr.
Sonymen qatar Úkimet basshysy atqarylǵan jumystardy aqparattyq súıemeldeý boıynsha Aqparat jáne kommýnıkatsııalar mınıstrligine tıisti sharalardy atqarýdy júktedi.
Aıta keteıik, Úkimet basshysy monopolııaǵa qarsy qyzmetti kúsheıtý zańnamasyna túzetýler ázirlenip jatqandyǵyn habarlady.
Sonymen qatar ol jańa tarıfke qatysty árbir azamattyń usynysy eskerilýi kerektigin tapsyrdy.
Qazaqstanda áleýmettik mańyzy bar taýarlardyń baǵasy baqylaýǵa alynady.
