Úkimet basshysy úleskerlerdiń máselelerin talqylaý úshin Astananyń damý jónindegi memkomıssııasy músheleriniń basyn qosýdy tapsyrdy
ASTANA. Qyrkúıektiń 27-si. QazAqparat /Marlan Jıembaı/ - Búgin Úkimet otyrysy barysynda QR Premer-Mınıstri Kárim Másimov úleskerlerdiń máselelerin talqylaý úshin birinshi orynbasaryna Astananyń damý jónindegi memlekettik komıssııasy músheleriniń basyn qosýdy tapsyrdy.
«Ómirzaq Estaıuly, Astana boıynsha memlekettik komıssııany jınaý kerek shyǵar. Másele bireý - úleskerler. Ákim qurylys nysandaryna shyǵýǵa daıyndalsyn», dedi K.Másimov.
Aıta keteıik, Úkimet otyrysy barysynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın aǵymdaǵy jyly paıdalanýǵa berilýi josparlanǵan úleskerlerdiń qatysýyndaǵy birqatar nysandardyń tapsyrylý merzimi kelesi jylǵa shegerilgendigin málim etken bolatyn. Agenttik nysandardyń aıaqtalýynyń jańa kestesin ázirledi. Qujatqa sáıkes, qyrkúıektiń 25-ine deıin qurylysy aıaqtalmaǵan 89 nysannyń 55-in jyl sońyna deıin tapsyrý josparlanyp otyr. Al 34 nysan 2011 jylǵa shegerildi. Astana boıynsha jańa kestege sáıkes 7 nysan 2011 jylǵa qaldyryldy.
