Úkimet basshysy úleskerler aldynda qurylysshylardyń jaýapkershiligin kúsheıtýdi tapsyrdy
ASTANA. 22 qazan. QazAqparat - Búgin Úkimet otyrysynda Premer-Mınıstr Serik Ahmetov qurylysshylardyń jaýapkershiligin kúsheıte otyryp, turǵyn úı qurylysyna úleskerlerdiń qarjysyn tartýdy tapsyrdy. Osy oraıda Úkimet basshysy baspana salýda negizgi úles kommertsııalyq turǵyn úıge tıesili ekenin atap ótti. Bul óz kezeginde 90 paıyz deńgeıindegi kórsetkishke teń.
«Bul - qalypty kórsetkish. Sebebi, «Qoljetimdi baspana-2020» baǵdarlamasy baǵyttarynyń barsha ákimshileriniń basty maqsaty - turǵyn úı qurylysynda jeke ınvestıtsııalardy yntalandyrý, onyń ishinde kommertsııalyq jáne jeke turǵyn úı qurylysy. Alaıda, bul jerde zańnamalyq deńgeıde birqatar problema bar. Turǵyn úı qurylysynda úlestik qatysý týraly zańǵa engizilgen ózgeristerdi eskere otyryp, qurylys salýshy kompanııalar úleskerlerdiń qarjysyn tartýǵa quqy joq. Men Óńirlik damý mınıstrligine qurylys júrgizetin kompanııa men úleskerlerdiń kóńilinen shyǵatyn tetikti ázirleýdi tapsyrdym. Búginde atalǵan baǵytta qıǵashtyq bar»,- dedi S. Ahmetov.
Óz kezeginde QR Óńirlik damý vıtse-mınıstri Qaıyrbek Óskenbaev tapsyrmaǵa sáıkes úleskerlerdi qorǵaý júıesi ázirlengenin sóz etti. Onda úleskerler aldynda qurylys salýshylardyń azamattyq-quqyqtyq jaýapkershiligin saqtandyrý eskerilgen.
«Atalǵan tetik Ulttyq bankten basqa barsha memlekettik organdarmen kelisildi. Bul turǵyda Ulttyq bank qarsy shyǵyp otyr. Olar balamaly tańdaý retinde kepildik etý júıesin usyndy, ıaǵnı kepildik qoryn qurýdy alǵa tartýda. Bul tetikti biz ázirlep, Qurylysshylar qaýymdastyǵyna jiberdik. Biz osy eki tetikti qarasha aıynda tanystyrýǵa daıynbyz», - dep tolyqtyrdy ol.
Bul turǵyda Premer-Mınıstr atalǵan eki qujat Úkimet qaraýyna 15 qarashaǵa deıin usynylýy tıis ekendigin júktedi.
«Bul máselelerdi kelisip, alǵa jyljý kerek. Sebebi, biz qalys kele jatyrmyz. Tıisti tetik bolmaǵandyqtan úleskerlerdiń ınvestıtsııasyn tarta almaı otyrmyz. Qurylysshylarda úleskerler men olardyń qarjysyn tartý múmkindigi bar. Alaıda úleskerlerdi qorǵaýǵa aıryqsha nazar aýdarý kerek. Sebebi, osy kúnge deıin úleskerler problemasy ár óńirde shyǵyp jatyr. Men óz deńgeıimde bul eki nusqany qarastyramyn», - dedi S. Ahmetov.
