Úkimet basshysy TJM-nyń bos turǵan qoımalaryn oblystardyń kókónis saqtaıtyn qoımasy retinde paıdalanýdy usyndy

Bul jaıynda Premer-Mınıstr búgin selektorlyq rejımde ótip jatqan Úkimet otyrysynda aıtyp ótti.

Aýyl sharýashylyǵy mınıstri Asylbek Mamytbekovtyń sózine qaraǵanda, búginde 300 myń tonnaǵa jýyq kókónisti saqtaıtyn qoımalar jetispeıdi. Qazirgi kezde "QazAgro" jelisi boıynsha 60 myń tonnaǵa eseptelgen kókónis qoımalarynyń qurylysy boıynsha jobalar iske asyrylyp jatyr. Alaıda bul qajetti kólemniń tek 20 paıyzyn ǵana qamtamasyz etedi. A. Mamytbekovtyń paıymdaýynsha, aldaǵy 3 jylda elimizdegi qoımalardyń jetispeýshiligin 50 paıyzǵa deıin tómendetý kerek.

Óz kezeginde Tótenshe jaǵdaılar mınıstri Vladımır Bojko vedomstvo qaramaǵynda qazirgi kezde bos turǵan qoımalar bar ekenin málim etti. Onyń aıtýynsha, tótenshe jaǵdaılardyń qaramaǵynda janar-jaǵarmaı quıatyn úlken oryndar men Almaty jáne Qaraǵandy qalalarynda 2 myń tonnaǵa jýyq kólemdegi bos turǵan tońazytqysh jabdyqtary bar.

Sonymen qatar ol kúrish jáne jarma ónimderin saqtaýǵa arnalǵan qurǵaq qoımalar da bar ekenin atap ótti. Osy oraıda Úkimet basshysy óziniń birinshi orynbasary Ó. Shókeevke Aýyl sharýashylyǵy jáne Tótenshe jaǵdaılar mınıstrlikterimen, ákimdiktermen birlese bul máseleni úılestirýdi tapsyrdy.

«Atap aıtqanda, tótenshe jaǵdaılar júısindegi qoımalardy ákimdikterge paıdalanýǵa múmkindik jasalýy tıis»,-dedi K. Másimov.