Úkimet basshysy: Transfertterdi anyqtaýda óńirlerdiń ereksheligi eskerildi
NUR-SULTAN. QazAqparat – Jalpy sıpattaǵy transfertterdiń kólemin anyqtaý kezinde árbir óńirdiń ereksheligi jáne olardyń ekonomıkalyq damý deńgeıleri eskerildi. Bul týraly Premer-Mınıstr Asqar Mamın aıtty, dep habarlaıdy QazAqparat tilshisi.
«Respýblıkalyq bıýdjette kózdelgen qarajat memlekettik barlyq áleýmettik mindettemelerin tolyq oryndaýǵa múmkindik beredi. 2020-2022 jyldarǵa arnalǵan jalpy sıpattaǵy transfertterdiń kólemin anyqtaý kezinde árbir óńirdiń ereksheligi jáne olardyń ekonomıkalyq damý deńgeıleri eskerildi. Bıýdjet shyǵystary ekonomıkanyń naqty sektorlaryn qoldaýǵa, onyń ishinde ındýstrııalyq-ınnovatsııalyq damýdy qamtamasyz etýge, turǵyn úı jáne kólik ınfraqurylymyna, agroónerkásip kesheni men tsıfrlandyrýǵa, ónimdi jumyspen qamtýǵa jáne taǵy da basqa salalarǵa baǵyttalatyn bolady», - dedi Asqar Mamın.
Úkimet basshysy óz sózine zań jobalaryna Memleket basshysy kelisim bergenin atap ótip, belgilengen tártippen respýblıkalyq bıýdjettik komıssııanyń otyrysynda maquldanǵanyn jetkizdi. Otyrysta zań jobalaryn Úkimet músheleri bir aýyzdan qoldap, daýys berdi.
«Ulttyq ekonomıka men Qarjy mınıstrligi Premer-Mınıstrdiń Keńsesimen birge atalǵan zań jobalaryn Parlament Májilisine engizýdi qamtamasyz etýi tıis», - dedi Asqar Mamın.
Aıan Bekenuly
