Úkimet basshysy tamyzǵa deıin «Energııa únemdeý - 2020» baǵdarlamasynyń jobasyn daıarlaýdy júktedi
ASTANA. 14 mamyr. QazAqparat - Premer-Mınıstr Serik Ahmetov QR Indýstrııa jáne jańa tehnologııalar mınıstrligine ózge memlekettik organdarmen birlesip bıylǵy 1 tamyzǵa deıin Úkimet qaraýyna energııa únemdeýdiń 2020 jylǵa deıingi aralyǵyna negizdelgen baǵdarlamanyń jobasyn engizýdi tapsyrdy.
Bundaı tapsyrmany ol búgin bolǵan Úkimet otyrysynda júktedi.
Osy oraıda S. Ahmetov baǵdarlamanyń barlyq jaǵdaıy tyńǵylyqty qarastyrylýy, onyń ishinde qarjylandyrý baǵyttary jan-jaqty zerdelenýi qajet ekenin atap ótti.
«Negizgi talaptar men normalardy zańdardyń deńgeıinde qarastyrý kerek. Olar naqty ári túsinikti jáne tikeleı is-qımylǵa baǵyttalýy qajet. Eger de olar jaýapkershilik deńgeıinsiz, mindetsiz, bulyńǵyr bolsa, onda bul baǵdarlama oryndalmaı tuıyqqa tireletini sózsiz»,-dedi Premer-Mınıstr.
